കശ്മീരികള്‍ക്ക് തങ്ങള്‍ ഇന്ത്യാക്കാരാണെന്ന തോന്നല്‍ ഇല്ലാതായെന്ന് നാഷണല്‍ കോണ്‍ഫറന്‍സ് നേതാവും മുന്‍ മുഖ്യമന്ത്രിയുമായ ഫറൂഖ് അബ്ദുള്ള. ദിവയറിന് നല്‍കിയ അഭിമുഖത്തിലായിരുന്നു ഫാറുഖ് അബ്ദുള്ളയുടെ പരാമര്‍ശം. ഇന്ത്യയേക്കാള്‍ ചൈന തങ്ങളെ ഭരിക്കണമെന്നാണ് കശ്മിരി ജനങ്ങളുടെ ആഗ്രഹമെന്നും അഭിമുഖത്തില്‍ ഫാറൂഖ് അബ്ദുള്ള പറഞ്ഞു.
ഭരണഘടനയിലെ 370, 35 എ വകുപ്പുകള്‍ റദ്ദാക്കിയതിലൂടെ മോദി തന്നെ വഞ്ചിച്ചു. 2019ല്‍ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയപ്പോള്‍, കശ്മീരിന്റെ പ്രത്യേക അവകാശങ്ങള്‍ എടുത്ത് കളയില്ലെന്നായിരുന്നു തനിക്ക് തോന്നിയത്. പക്ഷെ താന്‍ തെറ്റിദ്ധരിക്കപ്പെട്ടു. ജനങ്ങള്‍ക്ക് മുന്നില്‍ ഞാന്‍ വഞ്ചകനായി. കേന്ദ്രം തന്നെ തടവിലാക്കുകയും ചെയ്തു, ഫറൂഖ് അബ്ദുള്ള പറഞ്ഞു.
കശ്മീരിലെ ആളുകള്‍ക്ക് കേന്ദ്ര സര്‍ക്കാരിനെ വിശ്വസമില്ല. വിഭജന വേളയില്‍ ഇവിടുത്തെ ആളുകള്‍ക്ക് പാകിസ്ഥാനിലേക്ക് പോകാന്‍ വളരെ എളുപ്പമായിരുന്നു. പക്ഷേ അവര്‍ ഗാന്ധിയുടെ ഇന്ത്യയില്‍ ചേര്‍ന്നു, മോദിയുടെ ഇന്ത്യയല്ല.'-ഫറൂഖ് അബ്ദുള്ള പറഞ്ഞു. ഇന്ന് കശ്മീരികളില്‍ പലരും ചൈന വരാന്‍ ആഗ്രഹിക്കുന്നുവെന്ന് അവരോട് സംസാരിച്ചാല്‍ മനസ്സിലാക്കാന്‍ കഴിയും. കശ്മീരിന്റെ കാര്യത്തില്‍ ദേശീയ തലത്തില്‍ ബിജെപി നടത്തിയ അവകാശവാദം തികഞ്ഞ വിഡിഢിത്തമാണെന്നും ഫാറൂഖ് അബ്ദുള്ള വ്യക്തമാക്കി.
