ഡല്ഹി: പ്രധാനമന്ത്രി നരേന്ദ്രമോദിയെ വെല്ലുവിളിച്ച് വനിതാ ഗുസ്തി താരങ്ങള്. പ്രധാനമന്ത്രി നാരീശക്തിയെന്ന് പറഞ്ഞ് നടന്നാല് മാത്രം പോരെന്നും പ്രവര്ത്തിച്ചുകാണിക്കണമെന്നും ഗുസ്തി താരങ്ങള് പറഞ്ഞു. വനിതാ ഗുസ്തി താരങ്ങള്ക്കെതിരെ ലൈംഗികാതിക്രമം നടത്തിയ ബ്രിജ് ഭൂഷണ് ശരണ് സിംഗിനെപ്പോലുളളവരെ കായിക രംഗത്തുനിന്ന് പുറത്താക്കി നാരീശക്തി മുദ്രാവാക്യം പ്രവര്ത്തിച്ചുകാണിക്കണമെന്നാണ് താരങ്ങളുടെ ആവശ്യം. കേന്ദ്രസര്ക്കാര് പിരിച്ചുവിട്ട ഗുസ്തി ഫെഡറേഷന് ഓഫ് ഇന്ത്യയ്ക്ക് ഇന്ത്യന് ഒളിംപിക്സ് അസോസിയേഷന് അധികാരങ്ങള് തിരിച്ചുനല്കിയതിനു പിന്നാലെയാണ് ഗുസ്തി താരങ്ങളുടെ പ്രതികരണം.
'വനിതാ ഗുസ്തി താരങ്ങളെ ചൂഷണം ചെയ്ത ബ്രിജ് ഭൂഷണ് ശരണ്സിംഗിനെ വീണ്ടും കായികരംഗത്തേക്ക് തിരിച്ചെടുത്തിരിക്കുകയാണ്. ഇതിനെതിരെ പ്രതികരിക്കുമെന്നും ശക്തമായ നടപടിയെടുക്കുമെന്നും പ്രതീക്ഷിക്കുന്നു. മോദി എത്രത്തോളം രാജ്യത്തെ സ്ത്രീകള്ക്കൊപ്പം നില്ക്കുന്നുണ്ടെന്ന് ആ നടപടിയിലൂടെ കാണട്ടെ'-ഏഷ്യന് ഗെയിംസ് ജേതാവായ വിനേഷ് ഫോഗട്ട് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ബ്രിജ് ഭൂഷണ് സിംഗിനും സഞ്ജയ് സിംഗിനും സസ്പെന്ഷന് നല്കിയത് വെറും ഷോ മാത്രമാണെന്ന് അന്നേ മനസിലായിരുന്നെന്നും അവരെ പിന്നീട് അതേ സ്ഥാനങ്ങളിലേക്ക് തിരിച്ചെടുത്തപ്പോള് സംശയം ശരിയാണെന്ന് തെളിഞ്ഞെന്നും സാക്ഷി മാലിക് പറഞ്ഞു. ഫെഡറേഷന് ഭാരവാഹികള് നിയമത്തിന് അതീതരാണെന്ന മട്ടിലാണ് പ്രവര്ത്തിക്കുന്നതെന്നും അവര് കൂട്ടിച്ചേര്ത്തു.