ഡല്ഹി: ലോക്സഭാ തെരഞ്ഞെടുപ്പ് പ്രഖ്യാപനം മാര്ച്ച് 13-ന് ശേഷമെന്ന് റിപ്പോര്ട്ട്. ഒരുക്കങ്ങള് വിലയിരുത്താന് തെരഞ്ഞെടുപ്പ് കമ്മീഷന് നടത്തുന്ന സംസ്ഥാന പര്യടനം മാര്ച്ച് ആദ്യവാരം പൂര്ത്തിയാകും. നിലവില് തെരഞ്ഞെടുപ്പ് കമ്മീഷന് തമിഴ്നാട്ടിലാണ് പര്യടനം നടത്തുന്നത്. അടുത്ത ദിവസങ്ങളില് ഉത്തര്പ്രദേശിലും പിന്നീട് ജമ്മു കശ്മീരിലും സന്ദര്ശനം നടത്തും. ആന്ധ്രാ പ്രദേശ്, ഒഡീഷ, അരുണാചല് പ്രദേശ്, സിക്കിം എന്നീ സംസ്ഥാനങ്ങളിലെ നിയമസഭകളിലേക്കുളള തെരഞ്ഞെടുപ്പും പ്രഖ്യാപിക്കും. ജമ്മു കശ്മീരില് സുരക്ഷാ സാഹചര്യങ്ങള് അനുകൂലമെങ്കില് ലോക്സഭാ തെരഞ്ഞെടുപ്പിനൊപ്പം നിയമസഭാ തെരഞ്ഞെടുപ്പും നടത്തും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
സംസ്ഥാനങ്ങളിലെ സാഹചര്യം, പ്രശ്നബാധിത ബൂത്തുകളുടെ വിവരങ്ങള്, ആവശ്യമുളള സുരക്ഷാ ഉദ്യോഗസ്ഥരുടെ എണ്ണം അടക്കം തെരഞ്ഞെടുപ്പ് കമ്മീഷന് വിലയിരുത്തുന്നുണ്ട്. ഇത്തവണ തെരഞ്ഞെടുപ്പ് കൂടുതല് സുഗമമാക്കുന്നതിനായി ആര്ട്ടിഫിഷ്യല് ഇന്റലിജന്സ് (എഐ) ഉപയോഗിക്കാനും തെരഞ്ഞെടുപ്പ് കമ്മീഷന് തീരുമാനിച്ചിട്ടുണ്ട്. സമൂഹമാധ്യമങ്ങളില് തെറ്റായ വിവരങ്ങള് പ്രചരിക്കുന്നത് തടയാനാണ് എ ഐ ഉപയോഗിക്കുക. 96.88 കോടി വോട്ടര്മാരാണ് ലോക്സഭാ തെരഞ്ഞെടുപ്പില് വോട്ട് രേഖപ്പെടുത്തുക. 2019-ല് ഏപ്രില് 11 മുതല് മെയ് 19 വരെ ഏഴ് ഘട്ടങ്ങളായായിരുന്നു വോട്ടെടുപ്പ്. മെയ് 23-നായിരുന്നു ഫലപ്രഖ്യാപനം.