തൃശൂര്‍: അയോധ്യയില്‍ പ്രതിഷ്ഠിക്കുന്നത് ഗാന്ധിജി ആദര്‍ശപുരുഷനായിക്കണ്ട രാമനെയല്ലെന്ന് കവി കെ സച്ചിദാനന്ദന്‍. അയോധ്യയിലേത് ഹിന്ദുരാഷ്ട്രത്തിന്റെ യുദ്ധോദീപ്തനായ നേതാവായ രാമനാണെന്നും തന്റെ മനസിലുളളത് എല്ലാ മതങ്ങള്‍ക്കും ആദര്‍ശപുരുഷനായി ഗാന്ധി കണ്ട രാമനാണെന്നും സച്ചിദാനന്ദന്‍ പറഞ്ഞു. ഡി വൈ എഫ് ഐ സംഘടിപ്പിച്ച മനുഷ്യച്ചങ്ങലയ്ക്കുശേഷം തൃശൂര്‍ കോര്‍പ്പറേഷന്‍ പരിസരത്ത് നടത്ത യോഗത്തില്‍ സംസാരിക്കുകയായിരുന്നു അദ്ദേഹം.
'രണ്ടുദിവസത്തിനകം നടക്കാന്‍ പോകുന്നത് എന്റെ രാമന്റെ പ്രതിഷ്ഠയല്ല. എന്റെ മനസിലുളള രാമന്‍ ഗാന്ധിയുടെ രാമനാണ്. ആ രാമന്‍ അളളാഹുവും മിശിഹായുമായ രാമനാണ്. എല്ലാ മതങ്ങള്‍ക്കും എല്ലാ മനുഷ്യര്‍ക്കും ആദര്‍ശപുരുഷനായി ഗാന്ധി കണ്ട രാമനാണ്. ആ രാമനെയല്ല, ഹിന്ദുരാഷ്ട്രത്തിന്റെ യുദ്ധോദീപ്തനായ നേതാവായ രാമനെയാണ് ഇപ്പോള്‍ ഒരു പളളി തകര്‍ത്ത സ്ഥലത്ത് പ്രതിഷ്ഠിക്കാനൊരുങ്ങുന്നത്. അവിടെ നിശ്ചയമായും എന്റെ മനസിലുളള, ഗാന്ധിയുടെ മനസിലുളള രാമന്‍ സ്വസ്ഥനായിരിക്കില്ല'-സച്ചിദാനന്ദന്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ആ പ്രതിഷ്ഠയെ ഇന്ത്യയുടെ മുഴുവന്‍ പ്രതീകമാക്കാനുളള ശ്രമത്തെ ചെറുക്കുന്നത് ജനാധിപത്യത്തെ സ്‌നേഹിക്കുന്ന, സോഷ്യലിസത്തില്‍ വിശ്വസിക്കുന്ന, ഭരണഘടനയില്‍ വിശ്വസിക്കുന്ന, നീതിയിലും നിയമത്തിലും വിശ്വസിക്കുന്ന ഏതൊരു ഇന്ത്യന്‍ പൗരന്റെയും കടമയാണെന്ന് താന്‍ കരുതുന്നതായും അദ്ദേഹം കൂട്ടിച്ചേര്‍ത്തു.
