തിരുവനന്തപുരം: കോണ്ഗ്രസിന്റെ ഡിജിപി ഓഫീസ് മാര്ച്ചിനിടെയുണ്ടായ സംഘര്ഷത്തില് കെപിസിസി പ്രസിഡന്റ് കെ സുധാകരനെ ഒന്നാം പ്രതിയാക്കി പൊലീസ് കേസെടുത്തു. പ്രതിപക്ഷ നേതാവ് വിഡി സതീശനാണ് രണ്ടാം പ്രതി. ശശി തരൂരും രമേശ് ചെന്നിത്തലയും എംപിമാരുമുള്പ്പെടെ കണ്ടാലറിയാവുന്ന അഞ്ഞൂറോളം പേര്ക്കെതിരെ കേസെടുത്തിട്ടുണ്ട്. പൊലീസിനെ ആക്രമിക്കല്, മാധ്യമപ്രവര്ത്തകനെ കല്ലെറിയല് തുടങ്ങിയ കുറ്റങ്ങള് ചുമത്തി ജാമ്യമില്ലാ വകുപ്പ് പ്രകാരമാണ് തിരുവനന്തപുരം മ്യൂസിയം പൊലീസ് കേസെടുത്തിരിക്കുന്നത്.
കഴിഞ്ഞ ദിവസം കോണ്ഗ്രസ് നടത്തിയ ഡിജിപി ഓഫീസ് മാര്ച്ചില് പ്രതിപക്ഷ നേതാവ് വി ഡി സതീശന് പ്രസംഗിക്കുന്നതിനിടെയാണ് പൊലീസ് കണ്ണീര് വാതകവും ജലപീരങ്കിയും പ്രയോഗിച്ചത്. ജലപീരങ്കിയില് നിന്നുളള വെളളം നേതാക്കള് ഇരുന്ന വേദിവരെയെത്തി. കണ്ണീര് വാതകം പ്രയോഗിച്ചതോടെ കെപിസിസി പ്രസിഡന്റിന് ദേഹാസ്വസ്ഥ്യമുണ്ടായി.തുടര്ന്ന് അദ്ദേഹത്തെ ആശുപത്രിയിലേക്ക് മാറ്റുകയായിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അപ്രതീക്ഷിതമായി കണ്ണീര് വാതകം പ്രയോഗിച്ചുകൊണ്ട് പൊലീസ് കാണിച്ചത് ക്രൂരതയാണെന്നും സംഭവിച്ചത് അംഗീകരിക്കാന് കഴിയില്ലെന്നും പ്രതിപക്ഷത്തെ നേതാക്കള് പറഞ്ഞു. പൊലീസ് അതിക്രമത്തിനെതിരെ കെ സുധാകരന് എംപി ലോക്സഭാ സ്പീക്കര്ക്ക് പരാതി നല്കിയിട്ടുണ്ട്. കേരളാ പൊലീസ് ലോക്സഭാംഗമെന്ന നിലയില് തന്റെയും സഹപ്രവര്ത്തകരായ മറ്റ് ലോക്സഭാംഗങ്ങളുടെയും അവകാശത്തെ ലംഘിച്ചുവെന്നും കരുതിക്കൂട്ടി അപമാനിച്ചുവെന്നുമാണ് സുധാകരന്റെ പരാതി. മുഖ്യമന്ത്രി പിണറായി വിജയന്റെ നിര്ദേശപ്രകാരമാണ് പൊലീസിന്റെ നടപടിയെന്നും അദ്ദേഹം ആരോപിച്ചു.