കൊച്ചി: കളമശേരിയിലെ കണ്വെന്ഷന് സെന്ററിലുണ്ടായ സ്ഫോടനത്തില് ഒരു മരണം. നിരവധിപേര്ക്ക് പരിക്കേറ്റു. കളമശേരിയിലെ സാമ്ര ഇന്റര്നാഷണല് കണ്വെന്ഷന് സെന്റിലാണ് സ്ഫോടനമുണ്ടായത്. പരിക്കേറ്റവരെ കളമശേരി മെഡിക്കല് കോളേജ് ആശുപത്രിയില് പ്രവേശിപ്പിച്ചു. ഇതില് പലരുടെയും നില അതീവ ഗുരുതരമാണ്. യഹോവാ സാക്ഷികളുടെ മേഖലാ സമ്മേളനം നടക്കുന്നതിനിടെയാണ് സ്ഫോടനം നടന്നത്. ഒക്ടോബര് 27-ന് ആരംഭിച്ച സമ്മേളനത്തിന്റെ അവസാന ദിനമായിരുന്നു ഇന്ന്. രണ്ടായിരത്തിലേറെപ്പേര് സമ്മേളനത്തില് പങ്കെടുക്കാനെത്തിയിട്ടുണ്ടെന്നാണ് റിപ്പോര്ട്ട്.
രാവിലെ ഒന്പതരയോടെയാണ് സ്ഫോടനമുണ്ടായത്. അര മണിക്കൂറിനിടെ തുടരെ തുടരെ സ്ഫോടനമുണ്ടായെന്ന് ദൃസാക്ഷികള് പറഞ്ഞതായി മാധ്യമങ്ങള് റിപ്പോര്ട്ട് ചെയ്യുന്നു. പൊലീസും അഗ്നിരക്ഷാ സേനയുമെത്തിയാണ് സ്ഥിതി നിയന്ത്രണവിധേയമാക്കിയത്. ഓഡിറ്റോറിയത്തിലുണ്ടായിരുന്ന മുഴുവന് ആളുകളെയും പുറത്തിറക്കിയിട്ടുണ്ട്. സ്ഫോടനത്തിന്റെ കാരണം വ്യക്തമായിട്ടില്ല.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, കളമശേരിയില് സ്ഫോടനമുണ്ടായ പശ്ചാത്തലത്തില് മികച്ച ചികിത്സയൊരുക്കാന് ആരോഗ്യമന്ത്രി വീണാ ജോര്ജ്ജ് അധികൃതര്ക്ക് നിര്ദേശം നല്കി. എറണാകുളം ജില്ലയില് അവധിയിലുളള ഡോക്ടര്മാരുള്പ്പെടെ മുഴുവന് ആരോഗ്യപ്രവര്ത്തകരും അടിയന്തരമായി തിരിച്ചെത്തണമെന്നും കളമശേരി മെഡിക്കല് കോളേജ്, എറണാകുളം ജനറല് ആശുപത്രി, കോട്ടയം മെഡിക്കല് കോളേജ് എന്നിവിടങ്ങളില് അധിക സൗകര്യമൊരുക്കണമെന്നും മന്ത്രി നിര്ദേശിച്ചു.