തിരുവനന്തപുരം: കര്ണാടകയില് ബിജെപിയുമായി സഖ്യമുണ്ടാക്കുന്നതിന് മുഖ്യമന്ത്രി പിണറായി വിജയന്റെ പൂര്ണ്ണ പിന്തുണയുണ്ടായിരുന്നുവെന്ന മുന് പ്രധാനമന്ത്രിയും ജെഡിഎസ് ദേശീയ അധ്യക്ഷനുമായ എച്ച് ഡി ദേവഗൗഡയുടെ വാദം തളളി സംസ്ഥാനത്തെ ഏക ജെഡിഎസ് മന്ത്രി കെ കൃഷ്ണന്കുട്ടി. മുഖ്യമന്ത്രി പിണറായി വിജയന് ജെഡിഎസുമായി ഒരു ചര്ച്ചയും നടത്തിയിട്ടില്ലെന്നും ജെഡിഎസ് കേരളാ ഘടകത്തിന് ദേവഗൗഡയുടെ എന്ഡിഎ ബന്ധത്തോട് കടുത്ത വിയോജിപ്പാണെന്നും മന്ത്രി കെ കൃഷ്ണന്കുട്ടി പറഞ്ഞു.
'ഞങ്ങള് ഗാന്ധിജിയുടെയും ലോഹിയുടെയും ആശയങ്ങളാണ് പിന്തുടരുന്നത്. അത് എന്ഡിഎയ്ക്ക് എതിരാണ്. എന്ഡിഎ സഖ്യത്തിന് കേരളാ ഘടകം യാതൊരുവിധ സമ്മതവും മൂളിയിട്ടില്ല. ഞാനും മാത്യു ടി തോമസും ദേവഗൗഡയെ നേരില്ക്കണ്ട് എന്ഡിഎ സഖ്യത്തിന്റെ ഭാഗമാവില്ലെന്ന് അറിയിച്ചതാണ്'- മന്ത്രി കൂട്ടിച്ചേര്ത്തു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ബിജെപിയുമായി സഖ്യമുണ്ടാക്കിയതിനെതിരെ പ്രതിഷേധിച്ച സി എം ഇബ്രാഹിമിനെ സംസ്ഥാന അധ്യക്ഷസ്ഥാനത്തുനിന്നും നീക്കിയതിനുശേഷം നടത്തിയ വാര്ത്താ സമ്മേളനത്തിലാണ് ബിജെപിയുമായി സഖ്യമുണ്ടാക്കുന്നതിന് പിണറായി വിജയന്റെ പൂര്ണ പിന്തുണ ലഭിച്ചുവെന്ന് എച്ച് ഡി ദേവഗൗഡ പറഞ്ഞത്. ജെഡിഎസ് കേരളാ ഘടകവും സഖ്യനീക്കത്തെ പിന്തുണച്ചുവെന്നും സഖ്യത്തിന് പിണറായി വിജയന്റെ അംഗീകാരമുളളതിനാലാണ് ഇപ്പോഴും ജെഡിഎസിന്റെ എംഎല്എ മന്ത്രിയായി തുടരുന്നതെന്നും ദേവഗൗഡ പറഞ്ഞിരുന്നു.