മലപ്പുറം: മുസ്ലീം ലീഗ് സംസ്ഥാന ജനറല് സെക്രട്ടറി പി എം എ സലാം സമസ്തയ്ക്കെതിരെ നടത്തിയെന്ന് പറയുന്ന പരാമര്ശത്തിന്റെ പേരില് ഒരു സമസ്ത നേതാവുപോലും പ്രതിഷേധമറിയിച്ചിട്ടില്ലെന്ന് ലീഗ് സംസ്ഥാന അധ്യക്ഷന് പാണക്കാട് സാദിഖലി ശിഹാബ് തങ്ങള്. കഴിഞ്ഞ ദിവസംപോലും സമസ്തയുടെ ഉത്തരവാദിത്തപ്പെട്ട നേതാക്കളുമായി കാണുകയും സംസാരിക്കുകയും ചെയ്തിരുന്നെന്നും അവരാരും പ്രതിഷേധമറിയിച്ചിട്ടില്ലെന്നും സാദിഖലി തങ്ങള് പറഞ്ഞു. തലയിരിക്കുമ്പോള് വാലാടേണ്ട കാര്യമില്ലെന്നും സമസ്തയുടെ യുവജന സംഘടനകളുടെ പ്രതിഷേധത്തെ പരോക്ഷമായി വിമര്ശിച്ച് അദ്ദേഹം പറഞ്ഞു.
'തട്ടം വിവാദത്തില് സമസ്ത അധ്യക്ഷന് ജിഫ്രി തങ്ങളെ ഉദ്ദേശിച്ചല്ല പിഎംഎ സലാം പരാമര്ശം നടത്തിയത്. ഇക്കാര്യം അദ്ദേഹം പാര്ട്ടിയോട് പറഞ്ഞിട്ടുണ്ട്. തട്ടം വിവാദത്തെ വഴിതിരിച്ച് വിടാനുളള ശ്രമങ്ങളാണ് ഇപ്പോള് നടക്കുന്നത്. സമസ്തയുടെ മസ്തിഷ്കം ലീഗിനൊപ്പമാണ്. മുസ്ലീം ലീഗും അങ്ങനെ തന്നെയാണ്. സമസ്തയുമായി എപ്പോഴും യോജിച്ചാണ് പോയിട്ടുളളത്. തലയിരിക്കുമ്പോള് വാലാടുന്ന സ്വഭാവം ശരിയല്ല'- സാദിഖലി തങ്ങള് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
തട്ടം വിവാദത്തില് നടത്തിയ വാര്ത്താ സമ്മേളനത്തിലാണ് പിഎംഎ സലാം സമസ്ത നേതാക്കള്ക്കെതിരായ പരാമര്ശം നടത്തിയത്. 'മുഖ്യമന്ത്രിയുടെ ഫോണ് കോള് കിട്ടിയാല് എല്ലാമായെന്ന് ചിന്തിക്കുന്ന ആളുകളും നമ്മുടെ സമുദായത്തിലുണ്ട്. ഇവരുടെ പാര്ട്ടിയോടുളള സമീപനമെന്താണെന്ന് അവര് പറയണം'- എന്ന പിഎംഎ സലാമിന്റെ പരാമര്ശമാണ് സമസ്തയെ ചൊടിപ്പിച്ചത്.