കാബൂള്: പടിഞ്ഞാറന് അഫ്ഗാനിസ്ഥാനിലെ ഹെറാത്ത് പ്രവിശ്യയിലുണ്ടായ ഭൂകമ്പത്തില് മരണപ്പെട്ടവരുടെ എണ്ണം രണ്ടായിരം കടന്നു. രണ്ട് പതിറ്റാണ്ടിനിടെ രാജ്യത്തെ ബാധിച്ച ഏറ്റവും മാരകമായ ഭൂകമ്പങ്ങളിലൊന്നാണിത്. ഇന്നലെയാണ് റിക്ടര് സ്കെയിലില് 6.4 തീവ്രത രേഖപ്പെടുത്തിയ ഭൂചലനമുണ്ടായത്. ഹെറാത്തിലെ ഭൂകമ്പത്തില് മരണപ്പെട്ടവരുടെ എണ്ണം ഇനിയും ഉയരാമെന്ന് രാജ്യത്തെ ഇന്ഫര്മേഷന് ആന്ഡ് കള്ച്ചര് മന്ത്രാലയത്തിന്റെ വക്താവ് അബ്ദുള് വാഹിദ് റയാന് പറഞ്ഞു. ആറോളം ഗ്രാമങ്ങള് തകര്ന്നടിഞ്ഞെന്നും നൂറുകണക്കിന് ജനങ്ങള് കെട്ടിടങ്ങള്ക്കിടയില് കുടുങ്ങിക്കിടക്കുന്നുണ്ടെന്നും അദ്ദേഹം അറിയിച്ചു.
ഇന്നലെ അര മണിക്കൂറിനുളളില് ശക്തമായ മൂന്ന് ഭൂകമ്പമുണ്ടായതായി നാഷണല് സെന്റര് ഫോര് സീസ്മോളജി അറിയിച്ചിരുന്നു. 12:19 നും 12: 11-നും റിക്ടര് സ്കെയിലില് 6.1 തീവ്രത രേഖപ്പെടുത്തിയ ഭൂചലനമാണ് ഉണ്ടായത്. 12: 45-ന് 6.3 തീവ്രത രേഖപ്പെടുത്തിയ ഭൂകമ്പമുണ്ടായി. ഹെറാത്ത് നഗരത്തില് നിന്നും 40 കിലോമീറ്റര് അകലെയാണ് ഭൂകമ്പത്തിന്റെ പ്രഭവസ്ഥാനമെന്നാണ് റിപ്പോര്ട്ട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഓഗസ്റ്റ് 28-നും സെപ്റ്റംബര് നാലിനും അഫ്ഗാനിസ്ഥാനില് ഭൂകമ്പം റിപ്പോര്ട്ട് ചെയ്യപ്പെട്ടിരുന്നു. കഴിഞ്ഞ വര്ഷം ജൂണില് അഫ്ഗാനിസ്ഥാന്റെ കിഴക്കന് മേഖലയിലുണ്ടായ ഭൂകമ്പത്തില് ആയിരത്തിലധികം ആളുകളാണ് കൊല്ലപ്പെട്ടത്. പതിനായിരക്കണക്കിന് ജനങ്ങള്ക്ക് വീട് നഷ്ടമാവുകയും ചെയ്തു. അന്ന് റിക്ടര് സ്കെയിലില് 5.9 തീവ്രത രേഖപ്പെടുത്തിയ ഭൂചലനമാണ് ഉണ്ടായത്.