തിരുവനന്തപുരം: സോളാര്‍ ഗൂഢാലോചനക്കേസുമായി ബന്ധപ്പെട്ട് നിയമസഭയിലെ അടിയന്തര പ്രമേയ ചര്‍ച്ചയില്‍ ഭരണപക്ഷത്തെ പ്രതിക്കൂട്ടിലാക്കി കെ ടി ജലീല്‍ എംഎല്‍എ. സോളാര്‍ ഗൂഢാലോചനാക്കേസിനു പിന്നില്‍ കോണ്‍ഗ്രസുകാര്‍ തന്നെയാണെന്ന് കെ ടി ജലീല്‍ പറഞ്ഞു. നിങ്ങളുടെ ശത്രുക്കള്‍ നിങ്ങള്‍ക്കൊപ്പം ഇരിക്കുന്നവര്‍ തന്നെയാണെന്ന് കെ ടി ജലീല്‍ ചാണ്ടി ഉമ്മനോട് പറഞ്ഞു. വ്യക്തിഹത്യയോട് യോജിക്കാത്തവരാണ് ഇടതുപക്ഷത്തുളളവരെന്നും കേരളത്തിലെ പല വിവാദങ്ങളുടെയും അടിവേര് ചികഞ്ഞാല്‍ കോണ്‍ഗ്രസ് ഗ്രൂപ്പ് പോരിലാണ് എത്തിനില്‍ക്കുകയെന്നും ജലീല്‍ പറഞ്ഞു.
'ഐഎസ്ആര്‍ഒ ചാരക്കേസിനുശേഷം കോണ്‍ഗ്രസുകാര്‍ ഉണ്ടാക്കിയതാണ് സോളാര്‍ കേസ്. അതിന്റെ ശില്‍പ്പികളും പിതാക്കന്മാരും കോണ്‍ഗ്രസുകാര്‍ തന്നെയാണ്. സോളാര്‍ രക്തത്തില്‍ ഇടതുപക്ഷത്തിന് പങ്കില്ല. ഇടതുപക്ഷത്തിന് രാഷ്ട്രീയ എതിരാളികളെയുളളു. രാഷ്ട്രീയ ശത്രുക്കളില്ല. രാഷ്ട്രീയ ശത്രുക്കള്‍ ഉമ്മന്‍ചാണ്ടിയുടെ പാളയത്തില്‍ തന്നെയാണ് ഉളളത്. സോളാര്‍ കേസ് ഉയര്‍ത്തിക്കൊണ്ടുവന്നത് കോണ്‍ഗ്രസുകാരാണ്. സോളാറില്‍ സിപിഎമ്മിന് എന്ത് പങ്കാണുളളത്? വ്യക്തിഹത്യയോട് യോജിക്കാത്ത പാര്‍ട്ടിയാണ് സിപിഎം. അതിന് പിണറായി വിജയന്‍ കൂട്ടുനില്‍ക്കില്ല.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സോളാറില്‍ ഇടത് മാധ്യമങ്ങള്‍ സ്വീകരിച്ച സമീപനം പരിശോധിക്കണം. കത്ത് പുറത്തുവിട്ടത് പാര്‍ട്ടി ബന്ധമുളള മാധ്യമങ്ങളല്ല. സിബി ഐയുടെ റിപ്പോര്‍ട്ടില്‍ എവിടെയെങ്കിലും ഇടതുസര്‍ക്കാരിന്റെ ഗൂഢാലോചനയെക്കുറിച്ച് പറയുന്നുണ്ടോ? ഉമ്മന്‍ചാണ്ടിയുടെ സ്റ്റാഫിനെ നീക്കിയത് പിണറായി ആണോ? ഉമ്മന്‍ചാണ്ടിയുടെ ഗണ്‍ മാന്‍ സലീം രാജിനെ അറസ്റ്റ് ചെയ്തത് യുഡിഎഫിന്റെ കാലത്താണ്. ശിവരാജന്‍ കമ്മീഷനെ നിയോഗിച്ചത് യുഡിഎഫാണ്. റിപ്പോര്‍ട്ട് നാട്ടില്‍ പാട്ടാക്കിയതും യുഡിഎഫാണ്. അതില്‍ എല്‍ഡിഎഫിന് ഒരു പങ്കുമില്ല. ഈ രക്തത്തില്‍ ഞങ്ങള്‍ക്കല്ല, നിങ്ങള്‍ക്കാണ് പങ്ക്'- കെ ടി ജലീല്‍ പറഞ്ഞു.
