ഡൽഹി: നടനും സംവിധായകനുമായ ആർ മാധവനെ പൂനെ ഫിലിം ഇൻസ്റ്റിറ്റ്യൂട്ട് ചെയർമാനായി നിയമിച്ചു. ഗവേണിംഗ് കൗൺസിൽ ചെയർമാനായും അദ്ദേഹം പ്രവർത്തിക്കും. കേന്ദ്രമന്ത്രി അനുരാഗ് താക്കൂറാണ് മാധവന്റെ നിയമനവിവരം എക്‌സിലൂടെ അറിയിച്ചത്. മാധവനെ അദ്ദേഹം അഭിനന്ദിക്കുകയും ചെയ്തു. മാധവന്റെ അനുഭവ സമ്പത്ത് പൂനെ ഫിലിം ഇൻസ്റ്റിറ്റ്യൂട്ടിൽ ഗുണകരമായ മാറ്റങ്ങൾ കൊണ്ടുവരുമെന്നും പുതിയ ഉയരങ്ങളിലെത്തിക്കുമെന്നും താൻ വിശ്വസിക്കുന്നുവെന്നാണ് അനുരാഗ് താക്കൂർ പറഞ്ഞത്.
തന്റെ ഫിലിം ഇൻസ്റ്റിറ്റ്യൂട്ട് ചെയർമാനായി നിയമിച്ചതിന് മാധവൻ കേന്ദ്രസർക്കാരിനും അനുരാഗ് താക്കൂറിനും നന്ദി പറഞ്ഞു. ഇൻസ്റ്റിറ്റ്യൂട്ടിന്റെ വികസനത്തിനായി തന്റെ കഴിവിന്റെ പരമാവധി പരിശ്രമിക്കുമെന്നും മാധവൻ പറഞ്ഞു. നടനും സംവിധായകനുമായ ശേഖർ കപൂറിന്റെ പിൻഗാമിയായാണ് മാധവനെത്തുന്നത്. ശേഖർ കപൂറിന്റെ കാലാവധി 2023 മാർച്ച് മൂന്നിന് അവസാനിച്ചിരുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അടുത്തിടെ മാധവൻ സംവിധാനം ചെയ്ത 'റോക്കട്രി; ദി നമ്പി ഇഫക്ട്' എന്ന ചിത്രത്തിന് മികച്ച ഫീച്ചർ ഫിലിമിനുളള ദേശീയ അവാർഡ് ലഭിച്ചിരുന്നു. ഐഎസ്ആർഒ ശാസ്ത്രജ്ഞനായിരുന്ന നമ്പി നാരായണന്റെ ജീവിതത്തെ ആസ്പദമാക്കി എടുത്ത ചിത്രമാണ് റോക്കട്രി ദി നമ്പി ഇഫക്ട്.
