കൊച്ചി: മുവാറ്റുപുഴ വാരപ്പെട്ടിയില്‍ കെഎസ്ഇബി വാഴകൃഷി വെട്ടിനശിപ്പിച്ച സംഭവത്തില്‍ കര്‍ഷകന് നഷ്ടപരിഹാരം കൈമാറി. കോതമംഗലം എംഎല്‍എ ആന്റണി ജോണാണ് സര്‍ക്കാര്‍ പ്രഖ്യാപിച്ച നഷ്ടപരിഹാരത്തുകയായ 3.50 ലക്ഷം രൂപ കര്‍ഷകന് കൈമാറിയത്. കെഎസ്ഇബി ഉദ്യോഗസ്ഥരുടെ സാന്നിദ്ധ്യത്തിലാണ് തുക കൈമാറിയത്. വാരപ്പെട്ടി പഞ്ചായത്തിലെ തോമസ് എന്ന കര്‍ഷകന്റെ വാഴകളാണ് വാഴയില ലൈനില്‍ മുട്ടിയതിന്റെ പേരില്‍ കെഎസ്ഇബി ജീവനക്കാര്‍ വെട്ടി നശിപ്പിച്ചത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഓണവിപണി ലക്ഷ്യമിട്ട് വളര്‍ത്തിയ വാഴകള്‍ യാതൊരു മുന്നറിയിപ്പുമില്ലാതെയാണ് കെഎസ്ഇബി ഉദ്യോഗസ്ഥര്‍ വെട്ടിമാറ്റിയത്. ഇതിനെതിരെ കൃഷിമന്ത്രി പി പ്രസാദ് രംഗത്തെത്തിയിരുന്നു. തുടര്‍ന്ന് വിഷയത്തില്‍ വൈദ്യുതി മന്ത്രിയും ഇടപെട്ടു. സംഭവത്തിലെ അന്വേഷണ റിപ്പോര്‍ട്ട് കെഎസ്ഇബിയുടെ നടപടി ന്യായീകരിക്കുന്നതാണെങ്കിലും വിളവെടുപ്പിന് തയാറായ വാഴകളാണ് വെട്ടിയത്, കര്‍ഷകനെ അറിയിച്ചില്ല, കര്‍ഷകനുണ്ടായ സാമ്പത്തിക നഷ്ടം എന്നിവ കണക്കിലെടുത്ത് പ്രത്യേക കേസായി പരിഗണിച്ച് നഷ്ടപരിഹാരം നല്‍കാന്‍ സര്‍ക്കാര്‍ തീരുമാനിക്കുകയായിരുന്നു.
