ഡല്‍ഹി: 77-ാം സ്വാതന്ത്ര്യദിനത്തിന്റെ നിറവില്‍ രാജ്യം. രാജ്യത്തുടനീളം വിപുലമായ രീതിയില്‍ ആഘോഷപരിപാടികളാണ് നടക്കുന്നത്. രാവിലെ ചെങ്കോട്ടയില്‍ പ്രധാനമന്ത്രി നരേന്ദ്രമോദി ദേശീയ പതാകയുയര്‍ത്തി. മഹാത്മാഗാന്ധിയുടെ സ്മൃതി മണ്ഡപമായ രാജ്ഘട്ടിലെത്തി പുഷ്പാര്‍ച്ചന നടത്തിയാണ് പ്രധാനമന്ത്രി ചെങ്കോട്ടയിലെത്തിയത്. കേന്ദ്രമന്ത്രിമാരായ അമിത് ഷാ, നിതിന്‍ ഗഡ്കരി, പീയുഷ് ഗോയല്‍ തുടങ്ങിയവര്‍ ചടങ്ങില്‍ പങ്കെടുത്തു. രാജ്യത്തിന്റെ വിവിധ ഭാഗങ്ങളില്‍നിന്നുളള തൊഴിലുറപ്പ് തൊഴിലാളികള്‍, നഴ്‌സുമാര്‍ ഉള്‍പ്പെടെ 1800 പേരെ സ്വാതന്ത്ര്യദിനാഘോഷ പരിപാടിയില്‍ പ്രത്യേക ക്ഷണിതാക്കളായി എത്തിയിട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മണിപ്പൂരിനെ പരാമര്‍ശിച്ചാണ് നരേന്ദ്രമോദി രാജ്യത്തെ അഭിസംബോധന ചെയ്തുളള പ്രസംഗം ആരംഭിച്ചത്. രാജ്യം മണിപ്പൂരിലെ ജനങ്ങള്‍ക്കൊപ്പമാണെന്നും സമാധാനത്തിലൂടെ മാത്രമേ പ്രശ്‌നങ്ങള്‍ പരിഹരിക്കാനാവുകയുളളുവെന്നും പ്രധാനമന്ത്രി പറഞ്ഞു. 'ഏതാനും ആഴ്ച്ചകളായി മണിപ്പൂരില്‍ അക്രമത്തിന്റെ തിരമാലകളാണ് നാം കണ്ടത്. നിരവധി പേര്‍ക്ക് ജീവന്‍ നഷ്ടമായി. നമ്മുടെ അമ്മമാരും സഹോദരിമാരും അപമാനിക്കപ്പെട്ടു. എന്നാല്‍ ഇപ്പോള്‍ മേഖലയില്‍ സമാധാനം പതുക്കെ തിരികെ വരുന്നു. ഇന്ത്യ മണിപ്പൂരിനൊപ്പം നില്‍ക്കുന്നു'-എന്നാണ് പ്രധാനമന്ത്രി പറഞ്ഞത്.
