മലപ്പുറം: മലബാറിലെ പ്ലസ് വണ്‍ സീറ്റ് ദൗര്‍ലഭ്യത്തില്‍ മുഖ്യമന്ത്രി പിണറായി വിജയന് കത്തയച്ച് സുപ്രീംകോടതി മുന്‍ ജഡ്ജി മാര്‍ക്കണ്ഡേയ കഡ്ജു. പ്രശ്‌നം പരിഹരിക്കാനാവില്ലെങ്കില്‍ മുഖ്യമന്ത്രി രാജിവെച്ച് പുറത്തുപോകണമെന്നും തന്റെ കത്തിന് മറുപടി ലഭിച്ചില്ലെങ്കില്‍ സര്‍ക്കാരിനെതിരെ നിയമനടപടികളുമായി മുന്നോട്ടുപോകുമെന്നും മാര്‍ക്കണ്ഡേയ കഡ്ജു പറഞ്ഞു. മുഖ്യമന്ത്രിക്ക് അയച്ച കത്തിന്റെ പൂര്‍ണരൂപം അദ്ദേഹം ഫേസ്ബുക്കില്‍ പങ്കുവെക്കുകയും ചെയ്തിട്ടുണ്ട്.
'കഴിഞ്ഞ ദിവസം ഒരു പരിപാടിയില്‍ പങ്കെടുക്കാനായി മലപ്പുറം സന്ദര്‍ശിച്ചു. പത്താംക്ലാസ് പാസാകുന്ന മലപ്പുറത്തെ കുട്ടികള്‍ തുടര്‍പഠനത്തിന് തടസം നേരിടുന്നതായി അറിയാന്‍ കഴിഞ്ഞു. അവരില്‍ പലരും 90 ശതമാനത്തിന് മുകളില്‍ മാര്‍ക്ക് നേടിയവരാണ്. കമ്പ്യൂട്ടര്‍ സയന്‍സ്, ഗണിതം, ഫിസിക്‌സ്, കെമിസ്ട്രി, ബയോളജി തുടങ്ങിയ വിഷയങ്ങളില്‍ പ്ലസ് വണ്‍ പ്രവേശനം നേടാന്‍ ആഗ്രഹിക്കുന്നവര്‍. അവര്‍ക്ക് എഞ്ചിനീയര്‍മാരും ഡോക്ടര്‍മാരും ശാസ്ത്രജ്ഞരും ഐടി വിദഗ്ദരുമെല്ലാം ആകാന്‍ സാധിക്കും. ഈ വിഷയങ്ങളില്‍ സീറ്റുകള്‍ കുറവായതിനാല്‍ അവര്‍ക്കുമുന്നില്‍ വാതിലുകള്‍ കൊട്ടിയടയ്ക്കപ്പെട്ടിരിക്കുകയാണ്. പ്രശ്‌ന പരിഹാരത്തിനായി നിങ്ങളോടും നിങ്ങളുടെ സര്‍ക്കാരിനോടും പാര്‍ട്ടി എംഎല്‍എമാരോടും സഖ്യകക്ഷികളോടും നിരന്തമായി അഭ്യര്‍ത്ഥിച്ചിട്ടും ഇടപെടലൊന്നും ഉണ്ടായില്ലെന്നാണ് അറിയാന്‍ സാധിച്ചത്. ഇതൊരു വലിയ കുറ്റകൃത്യമായാണ് ഞാന്‍ കാണുന്നത്. യുവാക്കളുടെ ജീവിതം വെച്ചാണ് നിങ്ങള്‍ കളിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഈ കുറ്റകൃത്യത്തില്‍ മുഖ്യമന്ത്രിയും സര്‍ക്കാരും നേരിട്ട് ഉത്തരവാദികളാണ്. നിങ്ങള്‍ ഒരുപാട് സംസാരിക്കുന്നുണ്ട് പക്ഷെ പ്രവൃത്തിയില്‍ അത് കാണുന്നില്ല. എന്നോടൊപ്പം പരിപാടിയില്‍ പങ്കെടുത്ത സ്പീക്കര്‍ എ എന്‍ ഷംസീറിനോട് ഞാന്‍ വിഷയം സൂചിപ്പിച്ചിട്ടുണ്ട്. ഈ പ്രശ്‌നത്തിന് വേഗത്തില്‍ പരിഹാരമുണ്ടാക്കാന്‍ ഞാന്‍ നിങ്ങളോട് ആവശ്യപ്പെടുകയാണ്. അല്ലെങ്കില്‍ ഓഫീസ് വിട്ട് പോകൂ. ഈ കത്തിന് മറുപടി ലഭിച്ചില്ലെങ്കില്‍ നിങ്ങള്‍ക്ക് ഗുരുതരമായ പ്രത്യാഘാതങ്ങള്‍ നേരിടേണ്ടിവരും'- എന്നാണ് മാര്‍ക്കണ്ഡേയ കഡ്ജു കത്തില്‍ പറയുന്നത്.
കുട്ടികളുടെ ജീവിതംവെച്ചാണ് രാഷ്ട്രീയക്കാര്‍ കളിക്കുന്നതെന്നും പ്രശ്‌നം പരിഹരിക്കാനാവില്ലെങ്കില്‍ രാജിവെച്ച് പോകണമെന്നും വേദിയില്‍വെച്ചുതന്നെ മാര്‍ക്കണ്ഡേയ കഡ്ജു സ്പീക്കര്‍ എ എന്‍ ഷംസീറിനോട് പറഞ്ഞിരുന്നു. സ്പീക്കര്‍ പ്രശ്‌നം മുഖ്യമന്ത്രിയുടെ ശ്രദ്ധയില്‍പ്പെടുത്തി പരിഹരിക്കണമെന്നും അല്ലാത്തപക്ഷം അടുത്ത തെരഞ്ഞെടുപ്പില്‍ താന്‍ സമരം നടത്തുമെന്നും അദ്ദേഹം പറഞ്ഞിരുന്നു.
