തിരുവനന്തപുരം: ഓപ്പറേഷന്‍ തിയറ്ററില്‍ മതം അനുശാസിക്കുന്ന തരത്തില്‍ കൈയ്യും തലയും മൂടുന്ന വസ്ത്രം ധരിക്കാന്‍ അനുവദിക്കണമെന്ന മെഡിക്കല്‍ കോളേജിലെ ഏഴ് വിദ്യാര്‍ത്ഥികളുടെ ആവശ്യത്തില്‍ പ്രതികരണവുമായി ഐ എം എ സംസ്ഥാന ഘടകം. ഓപ്പറേഷന്‍ തിയറ്ററില്‍ രോഗിയുടെ സുരക്ഷയ്ക്കാണ് പ്രാധാന്യമെന്നും ആഗോളതലത്തില്‍ സ്വീകരിക്കപ്പെട്ട മാനദണ്ഡങ്ങളാണ് ഓപ്പറേഷന്‍ തിയറ്ററില്‍ പാലിക്കുന്നത്, അത് തുടര്‍ന്നുപോകണമെന്നാണ് തങ്ങളുടെ അഭിപ്രായമെന്നും ഐ എം എ സംസ്ഥാന പ്രസിഡന്റ് ഡോ. സുല്‍ഫി നൂഹ് പറഞ്ഞു.
'ലോകത്ത് എല്ലായിടത്തും ആശുപത്രികളില്‍ ഓപ്പറേഷന്‍ തിയറ്ററുകളിലെ ഏറ്റവും പ്രധാനപ്പെട്ട വ്യക്തി രോഗിയാണ്. രോഗികള്‍ക്ക് അണുബാധയുണ്ടാവാതിരിക്കാന്‍ ആഗോളതലത്തില്‍ സ്വീകരിക്കപ്പെട്ട ചില പ്രോട്ടോക്കോളുകള്‍ ഓപ്പറേഷന്‍ തിയറ്ററുകളിലുണ്ട്. അത് കാത്തുസൂക്ഷിച്ച് മുന്നോട്ടുപോകണമെന്നാണ് ഇന്ത്യന്‍ മെഡിക്കല്‍ അസോസിയേഷന് ഇക്കാര്യത്തിലുളള അഭിപ്രായം'- ഡോ. സുല്‍ഫി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
തിരുവനന്തപുരം മെഡിക്കല്‍ കോളേജിലെ വിവിധ ബാച്ചുകളില്‍ പഠിക്കുന്ന ഏഴ് വിദ്യാര്‍ത്ഥികളാണ് തലമറയ്ക്കുന്ന വസ്ത്രവും സ്‌ക്രബ് ജാക്കറ്റും ധരിക്കാന്‍ അനുമതി നല്‍കണമെന്ന് ആവശ്യപ്പെട്ട് പ്രിന്‍സിപ്പാളിന് കത്തയച്ചത്. തങ്ങളുടെ വിശ്വാസമനുസരിച്ച് മുസ്ലീം യുവതികള്‍ ഏത് സാഹചര്യത്തിലും ഹിജാബ് ധരിക്കേണ്ടത് നിര്‍ബന്ധമാണെന്നും ആശുപത്രി മാനദണ്ഡങ്ങള്‍ അനുസരിച്ചും ഓപ്പറേഷന്‍ റൂം നിര്‍ദേശങ്ങള്‍ പിന്തുടര്‍ന്നും ഹിജാബ് ധരിക്കാന്‍ സാധിക്കാത്ത സാഹചര്യമാണുളളതെന്നും അവര്‍ കത്തില്‍ പറയുന്നു. വിദ്യാര്‍ത്ഥികളുടെ ആവശ്യങ്ങള്‍ ഇപ്പോള്‍ അംഗീകരിക്കാനാവില്ലെന്നും രോഗികളുടെ സുരക്ഷയ്ക്കാണ് ഇപ്പോള്‍ പ്രാധാന്യമെന്നും കോളേജ് പ്രിന്‍സിപ്പാള്‍ നേരത്തെ വ്യക്തമാക്കിയിരുന്നു.
