മുംബൈ: ഇന്ത്യന്‍ ഓഹരിവിപണിയില്‍ റെക്കോര്‍ഡ് കുതിപ്പ്. സെന്‍സെക്സ് 64,000 ത്തിലും നിഫ്റ്റി 19,000 ത്തിലുമാണ് ക്ലോസ് ചെയ്തത്. കഴിഞ്ഞ മൂന്ന് ദിവസങ്ങളിലായി ഇന്ത്യന്‍ ഓഹരി വിപണിയില്‍ നടന്ന കുതിപ്പാണ് റെക്കോര്‍ഡ് നേട്ടത്തില്‍ കലാശിച്ചത്. സെന്‍സെക്സ് 499. 39 പൊയിന്‍റുയര്‍ന്ന് 64000 ത്തിലും നിഫ്റ്റി 154.70 പൊയിന്‍റുയര്‍ന്ന് 19,000 ത്തിലുമാണ് ക്ലോസ് ചെയ്തത്.
വിദേശ നിക്ഷേപകരുടെ ഇടപെടല്‍, മണ്‍സൂണ്‍ തുടക്കം, രാജ്യത്തെ പ്രധാന ധനകാര്യ സ്ഥാപനങ്ങളായ എച്ച് ഡി എഫ് സി ലിമിറ്റഡ് (ഹൌസിംങ്ങ് ഡെവലപ്മെന്‍റ് ഫിനാന്‍സ് കോര്‍പ്പറേഷന്‍ ലിമിറ്റഡ്) എച്ച് ഡി എഫ് സി ബാങ്ക് ലയന പ്രഖ്യാപനം, ജൂണ്‍ മാസത്തെ ഡെറിവേറ്റീവ് സീരിസിന്‍റെ കാലാവധി അവസാനിക്കുന്നത് തുടങ്ങിയവയാണ് വിപണിയെ സ്വാധീനിച്ചത് എന്നാണ് സാമ്പത്തിക വിദഗ്ദരുടെ വിലയിരുത്തല്‍.
വിപണി വന്‍ കുതിപ്പ് നടത്തിയതോടെ നിക്ഷേപകരുടെ ആദായത്തില്‍ രണ്ടു ലക്ഷത്തി ഇരുപതിനായിരം കോടിയുടെ വര്‍ദ്ധനവാണ് ഉണ്ടായത്. നാലുമാസത്തിനകം 1100 കോടി രൂപയുടെ നിക്ഷേപമാണ് വിദേശ നിക്ഷപമായി ഇന്ത്യന്‍ വിപണിയിലെത്തിയത്. ഇതോടൊപ്പം വന്‍കിട കമ്പനികളുടെ ഓഹരികളുടെ മുന്നേറ്റവും ഇന്ത്യന്‍ ഓഹരി വിപണിക്ക് കരുത്തു നല്‍കി എന്നാണ് വിലയിരുത്തപ്പെടുന്നത്.
