തിരുവനന്തപുരം: വ്യാജ സര്‍ട്ടിഫിക്കറ്റ് വിവാദം ആളിക്കത്തുന്നതിനിടെ എസ് എഫ് ഐയ്ക്കും സംസ്ഥാന സര്‍ക്കാരിനുമെതിരെ രൂക്ഷവിമര്‍ശനവുമായി ഗവര്‍ണര്‍ ആരിഫ് മുഹമ്മദ് ഖാന്‍. സര്‍വ്വകലാശാലകളില്‍ നിയമനം ലഭിക്കണമെങ്കില്‍ പാര്‍ട്ടി അംഗമായിരിക്കണം എന്നതാണ് കേരളത്തില്‍ നിലവിലെ സ്ഥിതിയെന്നും യോഗ്യതയില്ലാതെ പിഎച്ച്ഡി അഡ്മിഷന്‍ ലഭിക്കണമെങ്കില്‍ പാര്‍ട്ടിയുടെ വിദ്യാര്‍ത്ഥി സംഘടനയില്‍ അംഗമായാല്‍ മതിയെന്നും ഗവര്‍ണര്‍ പറഞ്ഞു. ഏത് നിയമവിരുദ്ധ പ്രവര്‍ത്തനവും ചെയ്യാനുളള ലൈസന്‍സാണ് എസ് എഫ് ഐ മെമ്പര്‍ഷിപ്പെന്നും പാര്‍ട്ടി മെമ്പര്‍ഷിപ്പെടുത്താല്‍ അധ്യാപകര്‍ വരെ ആകാമെന്നും അദ്ദേഹം പരിഹസിച്ചു.
'ഒരു പാര്‍ട്ടിയുടെ യുവജന സംഘടനയില്‍ അംഗമാണെങ്കില്‍ നിങ്ങള്‍ക്ക് നിരവധി ആനുകൂല്യങ്ങള്‍ ലഭിക്കും. പ്രത്യേക അധികാരങ്ങള്‍ ലഭിക്കും. യോഗ്യതയില്ലെങ്കിലും അഡ്മിഷന്‍ ലഭിക്കും. സര്‍വ്വകലാശാലകളില്‍ നിയമനം ലഭിക്കും. ദൗര്‍ഭാഗ്യവശാല്‍ ഇതാണ് ഇന്ന് സംസ്ഥാനത്തിന്റെ അവസ്ഥ. ഉന്നതവിദ്യാഭ്യാസ മേഖല പ്രതിസന്ധിയിലാണ്. പകുതിയിലധികം സര്‍വ്വകലാശാലകള്‍ക്ക് നാഥനില്ല. നോമിനികളുടെ പട്ടിക പോലും ലഭിച്ചിട്ടില്ല. ഇത്തരം വിഷയങ്ങള്‍ എന്റെ മുന്നിലെത്തിയാല്‍ നടപടി സ്വീകരിക്കും'- ഗവര്‍ണര്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, വ്യാജന്മാരുടെ കൂടാരമായി എസ് എഫ് ഐ മാറിയെന്നും സംഘടന പിരിച്ചുവിടണമെന്നും മുന്‍ പ്രതിപക്ഷ നേതാവ് രമേശ് ചെന്നിത്തല പറഞ്ഞു. സര്‍ട്ടിഫിക്കറ്റ് പരിശോധിക്കാന്‍ എസ് എഫ് ഐ സംസ്ഥാന സെക്രട്ടറിക്ക് എന്ത് അധികാരമാണുളളതെന്നും കായംകുളം കോളേജില്‍ നിഖില്‍ തോമസിന് അഡ്മിഷന്‍ കിട്ടാന്‍ ശുപാര്‍ശ ചെയ്ത സിപിഎം നേതാവ് ആരാണെന്നും ചെന്നിത്തല ചോദിച്ചു. 'പൊലീസിനെയും ഭരണസംവിധാനത്തെയും ഉപയോഗിച്ചാണ് വ്യാജന്മാര്‍ വിലസുന്നത്. എസ് എഫ് ഐയുടെ നേതൃത്വത്തില്‍ വ്യാജ സര്‍ട്ടിഫിക്കറ്റുണ്ടാക്കുന്ന കേന്ദ്രം തന്നെ പ്രവര്‍ത്തിക്കുന്നുണ്ടാകണം. തെറ്റിനെ ന്യായീകരിക്കുന്നവരാണ് കൂടുതല്‍ ശിക്ഷ അര്‍ഹിക്കുന്നത്'- ചെന്നിത്തല കൂട്ടിച്ചേര്‍ത്തു.
