കോഴിക്കോട്: കോഴിക്കോട് ബീച്ചില്‍ ഫുട്ബോള്‍ കളിക്കുന്നതിനിടയില്‍ കടലില്‍ ഇറങ്ങിയ രണ്ട് കുട്ടികളെ കാണാതായി. ഇന്ന് (ഞായറാഴ്ച) രാവിലെ എട്ടരയോടെയാണ് സംഭവം നടന്നത്. ബീച്ചിലെ ലയണ്‍സ് പാര്‍ക്കിന് സമീപത്ത് വെച്ചാണ് കുട്ടികളെ കാണാതായത്. രാവിലെ ഫുട്ബോള്‍ കളിക്കാനായി എത്തിയ അഞ്ച് അംഗസംഘത്തിലെ മുഹമ്മദ് ആദിൽ (18), ആദിൻ ഹസൻ (16) എന്നിവരെയാണ് കാണാതായത്.
കളിക്കുന്നതിനിടയില്‍ കടലിലേക്ക് പോയ പന്ത് എടുക്കാന്‍ ശ്രമിക്കുന്നതിനിടയില്‍ മൂന്ന് പേര്‍ അപകടത്തില്‍പ്പെടുകയായിരുന്നു. ഇതില്‍ ഒരാളെ രക്ഷപ്പെടുത്തി. പൊലീസും അഗ്നിശമന സേനയും മത്സ്യതൊഴിലാളികളും തിരച്ചില്‍ നടത്തുന്നുണ്ട്. കടലില്‍ കാണാതായ കുട്ടികള്‍ക്ക് നീന്തല്‍ അറിയില്ലെന്ന് പ്രദേശവാസികള്‍ പറഞ്ഞു. ഉള്‍ക്കടലില്‍ ശക്തമായ മഴയുള്ളതിനാല്‍ തിരമാലകള്‍ ഉയര്‍ന്നുപൊങ്ങുന്നുണ്ട്. അതിനാല്‍ രക്ഷാപ്രവര്‍ത്തനം ദുഷ്കരമാണെന്ന് മത്സ്യതൊഴിലാളികള്‍ പറഞ്ഞു.
