ചെന്നൈ: ജയിലര്‍ സിനിമയുടെ ഷൂട്ടിംഗ് അവസാന ഘട്ടത്തിലാണെന്ന് സംവിധായകന്‍ നെല്‍സന്‍ ദിലീപ് കുമാര്‍. രജനികാന്തിന്‍റെ ഷെഡ്യൂള്‍ പൂര്‍ത്തിയായെന്നും സിനിമ അധികം വൈകാതെ തന്നെ തിയേറ്ററിലെത്തുമെന്നും സംവിധായകന്‍ പറഞ്ഞു. ഒരു അവാര്‍ഡ് ദാന ചടങ്ങില്‍ സംസാരിക്കുകയായിരുന്നു നെല്‍സന്‍. വിജയ് നായകനായെത്തിയ 'ബീസ്റ്റി'ന് ശേഷം നെല്‍സണ്‍ സംവിധാനം ചെയ്യുന്ന ചിത്രമാണ് ജയിലര്‍.
ഏവരും പ്രതീക്ഷയോടെ കാത്തിരിക്കുന്ന ജയിലറിൽ മലയാളത്തിന്റെ പ്രിയ നടന്‍ മോഹൻലാലും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. പേര് സൂചിപ്പിക്കുന്നതുപോലെ ചിത്രത്തില്‍ ഒരു 'ജയിലറു'ടെ വേഷത്തിലാണ് രജനി എത്തുക. ലാലും രജനിയും നേർക്കുനേർ വരുന്ന ഒരു സംഘട്ടന രംഗവും ചിത്രത്തിലുണ്ടെന്നാണ് റിപ്പോര്‍ട്ട്‌. സണ്‍ പിക്‌ചേഴ്‌സിന്റെ ബാനറില്‍ കലാനിധി മാരനാണ് ചിത്രം നിര്‍മിക്കുന്നത്.
'മുത്തുവേൽ പാണ്ഡ്യൻ' എന്ന കഥാപാത്രത്തെയാണ് ജയിലറിൽ രജനികാന്ത് അവതരിപ്പിക്കുന്നത്. നെൽസൺ ദിലീപ് കുമാർ ആണ് സംവിധാനം. രമ്യാ കൃഷ്‍ണനും ചിത്രത്തില്‍ കരുത്തുറ്റ കഥാപാത്രമായി എത്തും. 'പടയപ്പ' എന്ന വന്‍ ഹിറ്റിന് ശേഷം 23 വര്‍ഷങ്ങള്‍ കഴിഞ്ഞാണ് രജനികാന്തും രമ്യാ കൃഷ്‍ണനും ഒന്നിക്കുന്നത്. മലയാളി താരം വിനായകനും കന്നഡ താരം ശിവരാജ് കുമാറും ചിത്രത്തിൽ പ്രധാന വേഷങ്ങള്‍ കൈകാര്യം ചെയ്യുന്നുണ്ട്.
