ഡൽഹി: സി പി ഐയ്ക്ക് ദേശീയ പാർട്ടി പദവി നഷ്ടമായതിൽ പ്രതികരണവുമായി ബിനോയ് വിശ്വം എംപി. സി പി ഐയുടെ അംഗീകാരം ജനങ്ങളുടെ ഹൃദയത്തിലാണെന്നും പോരാടുന്ന ജനങ്ങളുടെ ചോരയിലും വിയർപ്പിലും കണ്ണീരിലും കെട്ടിപ്പടുത്ത പാർട്ടിയാണ് സി പി ഐ എന്നും അദ്ദേഹം പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
'സാങ്കേതിക വീക്ഷണ കോണിൽ ദേശീയ അംഗീകാരം തീർച്ചയായും പ്രധാനമാണ്. അധ്വാനിക്കുന്ന ജനങ്ങളുടെ ഹൃദയത്തിലാണ് സി പി ഐയുടെ അംഗീകാരം. പോരാടുന്ന ജനങ്ങളുടെ രക്തവും വിയർപ്പും കണ്ണീരുംകൊണ്ടാണ് അത് കെട്ടിപ്പൊക്കിയത്. ജനാധിപത്യത്തിനും മതേതരത്വത്തിനും സോഷ്യലിസത്തിനുംവേണ്ടിയുളള പോരാട്ടം പാർട്ടി ശക്തമാക്കും'- ബിനോയ് വിശ്വം ട്വീറ്റ് ചെയ്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഇന്നലെ വൈകുന്നേരമാണ് തൃണമൂൽ കോൺഗ്രസ്, എൻസിപി, സി പി ഐ എന്നീ പാർട്ടികളുടെ ദേശീയ പാർട്ടി പദവി റദ്ദാക്കുന്നതായി തെരഞ്ഞെടുപ്പ് കമ്മീഷൻ ഉത്തരവിറക്കിയത്. ഇനിമുതല്‍ മൂന്ന് പാര്‍ട്ടികളും സംസ്ഥാന പാര്‍ട്ടികള്‍ മാത്രമായിരിക്കും. ആം ആദ്മി പാര്‍ട്ടിക്ക് ദേശീയ പാര്‍ട്ടി പദവി അനുവദിക്കുകയും ചെയ്തു. ഡല്‍ഹി, ഗോവ, പഞ്ചാബ്, ഗുജറാത്ത് എന്നീ സംസ്ഥാനങ്ങളിലെ തെരഞ്ഞെടുപ്പ് പ്രകടനത്തിന്റെ അടിസ്ഥാനത്തിലാണ് ആം ആദ്മി പാര്‍ട്ടിക്ക് ദേശീയ പാര്‍ട്ടി പദവി അനുവദിച്ചതെന്ന് തെരഞ്ഞെടുപ്പ് കമ്മീഷന് വ്യക്തമാക്കി.
