ഗാനമേളയ്ക്കിടെ വിനീത് ഓടി രക്ഷപ്പെട്ടുവെന്ന വാര്ത്ത വ്യാജമാണെന്ന് തിരക്കഥാകൃത്ത് സുനീഷ് വാരനാട്. ആരാധകരുടെ തിരക്ക് നിയന്ത്രിക്കാനാകാതെ വന്നപ്പോള് അദ്ദേഹം കാറിലേക്ക് ഓടി പോവുകയായിരുന്നുവെന്നും വിനീത് നടത്തിയ ഗംഭീരമായ പോഗ്രാം ആയിരുന്നു എന്നും സുനിഷ് ഫേസ്ബുക്കില് കുറിച്ചു. വിനീത് ശ്രീനിവാസന് നടത്തിയ പ്രോഗ്രാം പരാജയപ്പെട്ടതിനെതുടര്ന്ന് അദ്ദേഹം കാറിലേക്ക് ഓടി രക്ഷപ്പെടുന്നുവെന്ന തലക്കെട്ടില് ഒരു വീഡിയോ സാമൂഹിക മാധ്യമങ്ങളില് പ്രചരിച്ചിരുന്നു. ഈ സാഹചര്യത്തിലാണ് സുനീഷ് വാരനാട് രംഗത്തെത്തിയത്.
ഫേസ്ബുക്ക് പോസ്റ്റിന്റെ പൂര്ണരൂപം
വിനീത് ശ്രീനിവാസൻ ഓടി രക്ഷപ്പെട്ടു എന്ന പേരിൽ പ്രചരിക്കുന്ന വീഡിയോയുടെ വാസ്തവം
വാരനാട്ടെ കുംഭഭരണിയുത്സവത്തോടനുബന്ധിച്ച് വിനീതിന്റെ ഗാനമേളയുണ്ടായിരുന്നു.രണ്ടര മണിക്കൂറോളം ഗംഭീരമായ പരിപാടിയായിരുന്നു വിനീതും,സംഘവും നടത്തിയത്. അഭൂതപൂർവ്വമായ തിരക്കായിരുന്നു. ഗാനമേള കഴിഞ്ഞ് സെൽഫി എടുക്കാനും,ഫോട്ടോയെടുക്കാനും മറ്റുമായി ആരാധകർ തിങ്ങിനിറഞ്ഞതോടെ സ്റ്റേജിന് പിന്നിൽ നിന്നും കുറച്ചകലെ പാർക്ക് ചെയ്തിരുന്ന കാറിലേക്ക് പോലും പോകാനാകാതെ വന്നു. ബലമായി പിടിച്ചുനിർത്തി സെൽഫിയെടുക്കാൻ തുടങ്ങിയതോടെയാണ് വിനീത് അവിടെ നിന്നും കാറിലേക്കോടിയത്. 'പ്രോഗ്രാം മോശമായി;വിനീത് ഓടിരക്ഷപ്പെട്ടു' എന്ന പേരിലുള്ള ലിങ്കാകർഷണ ഷെയറുകൾ ആ നല്ല കലാകാരനോട് കാണിക്കുന്ന ക്രൂരതയാണ്.