കോഴിക്കോട്: മെഡിക്കല്‍ കോളേജ് പരിസരത്ത് മരണപ്പെട്ട നിലയില്‍ കണ്ടെത്തിയ ആദിവാസി യുവാവ് വിശ്വനാഥന് ആള്‍ക്കൂട്ട വിചാരണയ്ക്കിരയായിരുന്നെന്ന് സ്ഥിരീകരിച്ച് പൊലീസ്. വിശ്വനാഥന് ആദിവാസിയാണെന്ന് അറിഞ്ഞുകൊണ്ട് മോഷണക്കുറ്റം ആരോപിച്ച് ഒരുകൂട്ടം ആളുകള്‍ ചോദ്യംചെയ്തിരുന്നെന്നും പൊതുജനമധ്യത്തില്‍ അപമാനിതനായ മനോവിഷമത്തിലാണ് അദ്ദേഹം ആത്മഹത്യ ചെയ്തതെന്നുമാണ് പൊലീസ് പറയുന്നത്. മനുഷ്യാവകാശ കമ്മീഷന് സമര്‍പ്പിച്ച റിപ്പോര്‍ട്ടിലാണ് പൊലീസ് ഇക്കാര്യം പറയുന്നത്.
വിശ്വനാഥനെ മെഡിക്കല്‍ കോളേജിലെ മാതൃശിശു സംരക്ഷണ കേന്ദ്രത്തിന്റെ മെയിന്‍ ഗേറ്റിലും പരിസരത്തുംവെച്ചാണ് മോഷണക്കുറ്റം ആരോപിച്ച് ആളുകള്‍ ചോദ്യംചെയ്തതെന്നും ആദിവാസിയാണെന്ന് തിരിച്ചറിഞ്ഞാണ് സഞ്ചിയടക്കം വാങ്ങി പരിശോധിച്ചതെന്നും പൊലീസ് റിപ്പോര്‍ട്ടില്‍ പറയുന്നു. ഭാര്യയുടെ പ്രസവത്തിന് കൂട്ടിരിക്കാനെത്തിയ വയനാട് മേപ്പാടി സ്വദേശി വിശ്വനാഥനെ ഫെബ്രുവരി എട്ടിനാണ് ആശുപത്രിക്ക് സമീപമുളള മരത്തില്‍ തൂങ്ങിമരിച്ച നിലയില്‍ കണ്ടെത്തിയത്. യുവാവിനെ മോഷണക്കുറ്റം ആരോപിച്ച് സെക്യൂരിറ്റി ചോദ്യംചെയ്തിരുന്നെന്നും ആള്‍ക്കൂട്ട മര്‍ദ്ദനത്തിനിരയായിരുന്നെന്നും കുടുംബം ആരോപിച്ചിരുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
എന്നാല്‍ പോസ്റ്റ്മാര്‍ട്ടം റിപ്പോര്‍ട്ടില്‍ വിശ്വനാഥന്റേത് തൂങ്ങിമരണമാണെന്ന് സ്ഥിരീകരിച്ചു. ശരീരത്തില്‍ മര്‍ദ്ദനമേറ്റതിന്റെ ലക്ഷണമില്ലെന്നും പോസ്റ്റ്മാര്‍ട്ടം റിപ്പോര്‍ട്ടില്‍ പറഞ്ഞിരുന്നു. വിശ്വനാഥന് മരംകയറാന്‍ അറിയില്ലെന്നും റീപോസ്റ്റ്മാര്‍ട്ടം നടത്തണമെന്നും കുടുംബം ആവശ്യപ്പെട്ടിരുന്നു. ഈ പശ്ചാത്തലത്തിലാണ് വിശ്വനാഥന് ആള്‍ക്കൂട്ട വിചാരണയ്ക്കിരയായിരുന്നെന്ന് പൊലീസ് സ്ഥിരീകരിക്കുന്നത്.
