മുംബൈ: പഠാന്‍ സിനിമയുമായി ബന്ധപ്പെട്ട് ഉടലെടുത്ത വിവാദങ്ങളില്‍ പ്രതികരണവുമായി ചിത്രത്തിന്റെ സംവിധായകന്‍ സിദ്ധാര്‍ത്ഥ് ആനന്ദ്. സിനിമയില്‍ ആരുടെയും വികാരങ്ങള്‍ വ്രണപ്പെടുത്തുന്ന ഒന്നുംതന്നെയില്ലെന്നും പഠാന്‍ ദേശസ്‌നേഹത്തെക്കുറിച്ച് പറയുന്ന സിനിമയാണെന്നും സിദ്ധാര്‍ത്ഥ് ആനന്ദ് പറഞ്ഞു. വ്യാജ ബഹിഷ്‌കരണാഹ്വാനങ്ങള്‍ കേട്ട് വീട്ടിലിരിക്കാന്‍ പ്രേക്ഷകര്‍ വിഡ്ഢികളല്ലെന്നും അവരുടെ പിന്തുണയാണ് ചിത്രത്തിന്റെ വിജയമെന്നും അദ്ദേഹം പറഞ്ഞു.
'അവര്‍ പഠാനെ ബഹിഷ്‌കരിക്കാന്‍ ശ്രമിച്ചു. എന്നാല്‍ പ്രേക്ഷകര്‍ ഞങ്ങളെ പിന്തുണച്ചു. നിങ്ങള്‍ എന്തെങ്കിലും ബഹിഷ്‌കരിക്കുകയോ അതിനെതിരെ ശബ്ദമുയര്‍ത്തുകയോ ചെയ്യുകയാണെങ്കില്‍ വസ്തുതകളും യാഥാര്‍ത്ഥ്യങ്ങളുമുപയോഗിച്ച് അത് തെളിയിക്കേണ്ടതുണ്ട്. പഠാന്‍ ബഹിഷ്‌കരിക്കാനുളള അവരുടെ ശ്രമം പരിഹാസ്യമായിരുന്നു. പ്രേക്ഷകര്‍ അവര്‍ക്ക് മറുപടി കൊടുത്തുകഴിഞ്ഞു'- സിദ്ധാര്‍ത്ഥ് ആനന്ദ് പറഞ്ഞു.
പഠാന്‍ വിവാദത്തെക്കുറിച്ച് ഷാറൂഖ് ഖാനും പ്രതികരിച്ചിരുന്നു. സിനിമകളുടെ ഉദ്ദേശം സ്‌നേഹവും സാഹോദര്യവും സന്തോഷവും വ്യാപിപ്പിക്കുകയാണെന്നും ആരുടെയും വികാരം വ്രണപ്പെടുത്തലല്ലെന്നുമാണ് ഷാറൂഖ് ഖാന്‍ പറഞ്ഞത്. പഠാനിലെ ഗാനരംഗത്തിന്റെ പേരിലാണ് സംഘപരിവാര്‍ അനുകൂല സംഘടനകള്‍ ചിത്രത്തിനെതിരെ ബഹിഷ്‌കരണാഹ്വാനവുമായി രംഗത്തെത്തിയത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പഠാനിലെ ബേഷരം രംഗ് എന്ന ഗാനത്തില്‍ ദീപികാ പദുക്കോണ്‍ ധരിച്ച കാവി നിറമുളള ബിക്കിനി ഹിന്ദു വികാരം വ്രണപ്പെടുത്തിയെന്നാരോപിച്ചാണ് സംഘപരിവാര്‍ സംഘടനകള്‍ ചിത്രത്തിനെതിരെ ബഹിഷ്‌കരണാഹ്വാനം നടത്തിയത്. എന്നാല്‍ റിലീസായി ദിവസങ്ങള്‍ക്കുളളില്‍ തന്നെ ചിത്രം അഞ്ഞൂറുകോടി ക്ലബില്‍ ഇടം നേടി. അഞ്ചുദിവസത്തിനുളളില്‍ ആഗോളതലത്തില്‍ 545 കോടി രൂപ നേടിയെന്നാണ് റിപ്പോര്‍ട്ട്.
