തിരുവനന്തപുരം: സ്കൂളിൽ വിദ്യാർഥികൾ മൊബൈൽ ഫോൺ കൊണ്ടുവരുന്നതിനു നിരോധനം ഏര്പ്പെടുത്തരുതെന്ന് സംസ്ഥാന ബാലാവകാശ കമ്മീഷൻ ഉത്തരവ്. ചില പ്രത്യേക ആവശ്യങ്ങൾക്ക് രക്ഷിതാക്കളുടെ അറിവോടെ സ്കൂളുകളില് മൊബൈൽ ഫോൺ കൊണ്ടുവരാം. സ്കൂൾ സമയം കഴിയുന്നതുവരെ ഫോണ് സ്വിച്ച് ഓഫ് ചെയ്ത് സൂക്ഷിക്കാൻ സ്കൂൾ അധികൃതർ സൗകര്യമൊരുക്കണമെന്നും ഉത്തരവില് പറയുന്നു. കുട്ടികളുടെ അന്തസ്സിനും ആത്മാഭിമാനത്തിലും ക്ഷതമുണ്ടാകുംവിധമുള്ള ദേഹ, ബാഗ് പരിശോധന നടത്തുന്നത് കര്ശനമായി ഒഴിവാക്കണം. സ്കൂളില് എത്തിക്കഴിഞ്ഞാല് കുട്ടികള് മൊബൈല് ഫോണ് ഉപയോഗിക്കേണ്ടതില്ലെന്നാണ് കമ്മിഷന്റെ നിലപാട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നിലവില് കുട്ടികളില്നിന്നും പിടിച്ചെടുത്ത മൊബൈല് ഫോണുകള് അവര്ക്ക് തിരിച്ചു കൊടുക്കണമെന്നും ഉത്തരവില് പറയുന്നു. കുട്ടികള് മൊബൈല്ഫോണ് ഉപയോഗിച്ചാല് ആകാശം ഇടിഞ്ഞുവീഴുകയോ ഭൂമി നെടുകെ പിളരുകയോ ഇല്ല. കേവലനിരോധനമല്ല, സാമൂഹിക മാധ്യമ സാക്ഷരത ആര്ജിക്കാനുള്ള അവസരങ്ങള് ബോധപൂര്വം കുട്ടികള്ക്ക് നല്കുകയാണ് വേണ്ടത് എന്ന് കമ്മീഷന് അഭിപ്രായപ്പെട്ടു.
അധ്യാപകരും വിദ്യാര്ഥികളും മൊബൈല് ഫോണ് സ്കൂളില് കൊണ്ടുവന്നാല് കണ്ടുകെട്ടുന്നതിനും ലേലംവിളിച്ച് പി.ടി.എ. ഫണ്ടിലേക്ക് മുതല്കൂട്ടാമെന്നും 2010-ല് പൊതുവിദ്യാഭ്യാസവകുപ്പ് സര്ക്കുലര് ഇറക്കിയിരുന്നു. കോഴിക്കോട് വടകര സ്വദേശിയായ വിദ്യാർഥിയുടെ മൊബൈൽ ഫോൺ സ്കൂൾ അധികൃതർ പിടിച്ചെടുത്തതിനെതിരെ അച്ഛന് നൽകിയ ഹർജി പരിഗണിച്ചാണ് ബാലാവകാശ കമ്മീഷൻ സുപ്രധാനമായ ഉത്തരവ് പുറപ്പെടുവിച്ചിരിക്കുന്നത്.