കൊച്ചി: കൊച്ചി തീരത്ത് വന്‍ ലഹരിമരുന്ന് വേട്ട. 200 കിലോ ലഹരിമരുന്നുമായി ഇറാനിയന്‍ ഉരു പിടികൂടി. രഹസ്യവിവരത്തെത്തുടര്‍ന്ന് നാര്‍ക്കോട്ടിക്‌സ് കണ്‍ട്രോള്‍ ബ്യൂറോയും നേവിയും സംയുക്തമായി നടത്തിയ പരിശോധനയിലാണ് ലഹരിമരുന്ന് പിടികൂടിയത്. സംഭവത്തില്‍ ആറുപേരെ എന്‍സിബി കസ്റ്റഡിയിലെടുത്തിട്ടുണ്ട്. ഇവരെല്ലാം ഇറാനിയന്‍- പാക്കിസ്ഥാന്‍ പൗരന്മാരാണെന്നാണ് സൂചന. പിടിയിലായവരെ മട്ടാഞ്ചേരിയിലെത്തിച്ച് ചോദ്യംചെയ്ത് വരികയാണ്. ഇറാനില്‍നിന്ന് ഇന്ത്യന്‍ മഹാസമുദ്രം വഴി ലഹരിമരുന്ന് പാക്കിസ്ഥാനിലേക്ക് എത്തിക്കാനായിരുന്നു പദ്ധതിയെന്നാണ് ലഭിക്കുന്ന വിവരം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
തീരത്തുനിന്ന് 1200 നോട്ടിക്കല്‍ മൈല്‍ അകലെ പുറംകടലില്‍നിന്നാണ് ഇറാനിയന്‍ കപ്പല്‍ കണ്ടെത്തിയത്. തുടര്‍ന്ന് നേവിയും എന്‍സിബി സംഘവും ചേര്‍ന്ന് ഉരു വളയുകയും പരിശോധന നടത്തുകയുമായിരുന്നു. പിടികൂടിയ ലഹരിവസ്തുക്കള്‍ കൊച്ചിയിലെത്തിച്ചു. സമീപകാലത്ത് കൊച്ചിയില്‍ നടന്ന ഏറ്റവും വലിയ ലഹരിവേട്ടയാണിത്. കൊച്ചി തീരം വഴി ലഹരിമരുന്ന് കടത്ത് നടക്കുന്നതായി എന്‍സിബിക്ക് നേരത്തെ വിവരം ലഭിച്ചിരുന്നു. ഈ പശ്ചാത്തലത്തില്‍ കടലില്‍ കര്‍ശന നിരീക്ഷണവും ഏര്‍പ്പെടുത്തിയിരുന്നു. പിടിച്ചെടുത്ത ലഹരിമരുന്നുമായി ബന്ധപ്പെട്ട് കൂടുതല്‍ വിവരങ്ങള്‍ നേവിയോ എന്‍ സി ബിയോ പുറത്തുവിട്ടിട്ടില്ല.
