കോഴിക്കോട്: ഫറോക്കിലെ ടിപ്പുകോട്ടയില്‍ പഴയകാല മതില്‍ കണ്ടെത്തി. മൂന്നാംഘട്ട ഉത്ഖനനത്തിലാണ് ടിപ്പുവിന്റെ കാലത്ത് നിര്‍മ്മിച്ചതെന്ന് കരുതപ്പെടുന്ന മതിലിന്റെ അവശിഷ്ടങ്ങള്‍ കണ്ടെത്തിയത്. ചെങ്കല്ലിന്റെ പാറയില്‍ ചെങ്കല്ലുകള്‍ കെട്ടിവെച്ചാണ് കോട്ടമതില്‍ ഉണ്ടാക്കിയിട്ടുളളത്. ബ്രിട്ടീഷുകാര്‍ നിര്‍മ്മിച്ച ബംഗ്ലാവിനു മുന്‍വശത്താണ് മതില്‍ കണ്ടെത്തിയത്. നാലുമീറ്ററാണ് ഈ കോട്ടമതിലിന്റെ ഉയരം. ഉദ്ഖനനത്തില്‍ ആ കാലഘട്ടത്തിലെ പിഞ്ഞാണ പാത്രങ്ങളുടെ അവശിഷ്ടം, ചെമ്പുനാണയങ്ങള്‍, തിരകള്‍ എന്നിവയും കണ്ടെത്തിയിട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സ്വകാര്യ വ്യക്തിയുടെ കൈവശമാണ് ചരിത്രപ്രാധാന്യമുളള ഈ സ്ഥലം. അതുമായി ബന്ധപ്പെട്ട് കേസുകള്‍ നടക്കുകയാണ്. പ്രദേശത്തിന് സംരക്ഷിത ചരിത്രസ്മാരകമെന്ന രീതിയിലുളള പ്രാധാന്യം നല്‍കുമെന്ന് സ്ഥലം സന്ദര്‍ശിച്ച മന്ത്രി പി എ മുഹമ്മദ് റിയാസ് പറഞ്ഞു. 'ഇതിന്റെ പ്രാധാന്യവും പ്രത്യേകതയുമെല്ലാം ജനങ്ങള്‍ കാണാന്‍ ആഗ്രഹിക്കുന്നുണ്ട്. ഇന്ത്യയുടെ പലഭാഗങ്ങളില്‍നിന്നും ജനങ്ങള്‍ ഇത്തരം സ്ഥലങ്ങള്‍ സന്ദര്‍ശിക്കാനെത്തുന്നുണ്ട്. അപ്പോള്‍ നമ്മുടെ നാട്ടില്‍തന്നെയുളള ചരിത്രപ്രാധാന്യമുളള സ്ഥലങ്ങളുടെ വികസനം വൈകിപ്പിച്ചുകൂടാ. അങ്ങനെ ചെയ്താല്‍ അത് നാം കാലത്തോട് ചെയ്യുന്ന അനീതിയാണ്'- മന്ത്രി പറഞ്ഞു.
അതേസമയം, ടിപ്പുകോട്ടയിലെ മൂന്നാംഘട്ട ഉത്ഖനനം അവസാനിച്ചു. സ്ഥലത്ത് കൂടുതല്‍ ഉത്ഖനനം നടത്താന്‍ പുരാവസ്തു വകുപ്പ് ആര്‍ക്കിയോളജിക്കന്‍ സര്‍വേ ഓഫ് ഇന്ത്യക്ക് അപേക്ഷ നല്‍കും.
