തിരുവനന്തപുരം: മുഖ്യമന്ത്രി പിണറായി വിജയന്റെ അടുത്തേക്ക് ഓടിയെത്തിയ തെരുവുനായയെ ആട്ടിയോടിച്ച് സുരക്ഷാ ഉദ്യോഗസ്ഥര്. പി ബി യോഗത്തില് പങ്കെടുക്കാന് എ കെ ജി സെന്ററില് പിണറായി വിജയന് എത്തിയപ്പോഴായിരുന്നു തെരുവുനായ അടുത്തേക്ക് ഓടിയെത്തിയത്. ഇതിന്റെ ദൃശ്യങ്ങള് സാമൂഹിക മാധ്യമങ്ങളില് പ്രചരിക്കുന്നുണ്ട്. കേരളത്തില് തെരുവുനായ ശല്യം അതിരൂക്ഷമായ സാഹചര്യത്തില് പ്രതിപക്ഷം സര്ക്കാരിനെതിരെ കടുത്ത വിമര്ശനങ്ങള് ഉന്നയിക്കുന്ന സമയത്താണ് മുഖ്യമന്ത്രിക്ക് അടുത്തേക്ക് തെരുവുനായ എത്തിയത് കൗതുകമായത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കഴിഞ്ഞ ദിവസം പത്തനംതിട്ട ജില്ലാ മജിസ്ട്രേറ്റിനെ തെരുവുനായ കടിച്ചിരുന്നു. വെട്ടിപ്രത്ത് മജിസ്ട്രേറ്റുമാര് താമസിക്കുന്ന ക്വാട്ടേഴ്സിന് സമീപത്താണ് തെരുവുനായയുടെ ആക്രമണമുണ്ടായത്. വൈകീട്ട് നടക്കാനിറങ്ങിയ മജിസ്ട്രേറ്റിനാണ് നായയുടെ കടിയേറ്റത്. ആശുപത്രിയില് പ്രവേശിപ്പിച്ച മജിസ്ട്രേറ്റിന്റെ ആരോഗ്യനില തൃപ്തികരമാണ്. അതേസമയം, അക്രമകാരികളായ തെരുവുനായകളില് നിന്ന് മനുഷ്യരെ രക്ഷിക്കാന് സര്ക്കാരിന് ബാധ്യതയുണ്ടെന്ന് കേരളാ ഹൈക്കോടതി പറഞ്ഞു. അക്രമസ്വഭാവം കാണിക്കുന്ന നായകളെ തെരുവുകളില് നിന്നും മാറ്റിപാര്പ്പിക്കണമെന്നും കോടതി നിര്ദ്ദേശിച്ചു. സര്ക്കാര് ഉടനടി പ്രശ്നത്തിന് പരിഹാരം കാണണമെന്നും എന്തൊക്കെ നടപടികളാണ് ഈ വിഷയത്തില് സര്ക്കാര് ചെയ്യാന് ഉദ്ദേശിക്കുന്നതെന്നും കോടതിയെ അറിയിക്കണമെന്നും ജസ്റ്റിസുമാരായ എ കെ ജയശങ്കര് നമ്പ്യാര്, പി ഗോപിനാഥ് എന്നിവരുള്പ്പെടുന്ന ഡിവിഷന് ബെഞ്ച് ആവശ്യപ്പെട്ടു.