ഡല്‍ഹി: എം എം മണിയുടെ 'ഡല്‍ഹിയിലല്ലേ ഉണ്ടാക്കല്‍' പരാമര്‍ശത്തിന് മറുപടിയുമായി സി പി ഐ നേതാവ് ആനി രാജ. എം എം മണിയുടെ പരാമര്‍ശം അത്യന്തം സ്ത്രീവിരുദ്ധവും അപലപനീയവുമാണെന്ന് ആനി രാജ പറഞ്ഞു. 'സ്ത്രീപക്ഷ രാഷ്ട്രീയം ഉയര്‍ത്തിപ്പിടിക്കുകയാണ് എന്റെ ഉത്തരവാദിത്വം. അത് ഡല്‍ഹിയിലായാലും വിദേശത്തായാലും എന്റെ സ്വന്തം നാടായ കേരളത്തിലായാലും. ഇത്തരം അവഹേളനങ്ങള്‍ ശരിയാണോ എന്നത് മണിയെ ഉള്‍ക്കൊളളുന്ന രാഷ്ട്രീയപ്രസ്ഥാനം ആലോചിക്കണം. കാലങ്ങളായി ആര്‍ എസ് എസിന്റെയും ബിജെപിയുടെയും പൊലീസിനെ ഭയക്കാതെ സ്ത്രീപക്ഷ രാഷ്ട്രീയം ഉയര്‍ത്തിപ്പിടിച്ചാണ് മുന്നോട്ടുപോകുന്നത്. മണിയുടെ ഭീഷണിക്ക് ഒരിക്കലും വഴങ്ങില്ല. നരേന്ദ്രമോദിയും അമിത് ഷായും നോക്കിയിട്ട് ഭീഷണിപ്പെടുത്താനായിട്ടില്ല'- ആനി രാജ പറഞ്ഞു.
"ആനി രാജ ഡല്‍ഹിയിലല്ലേ ഉണ്ടാക്കുന്നത്. അവര്‍ക്ക് കേരളത്തിലെ പ്രശ്‌നങ്ങള്‍ അറിയില്ലല്ലോ"- എന്നായിരുന്നു എം എം മണിയുടെ പരാമര്‍ശം. 'സി പി ഐക്കാര് എന്തെങ്കിലുമൊക്കെ പറയും. ആനി രാജ ഡല്‍ഹിയിലല്ലേ ഉണ്ടാക്കുന്നത്. ഇവിടെയല്ലല്ലോ? ഇവിടെ നമ്മള്‍ നേരിട്ടുകൊണ്ടിരിക്കുന്ന പ്രശ്‌നം നമുക്കല്ലേ അറിയുകയുളളു. ആനി രാജയ്ക്ക് എങ്ങനെ അറിയാം? ഇനി അവര് പറഞ്ഞാലും നമുക്കതൊന്നും ഒരു വിഷയമല്ല. ഞാന്‍ പറഞ്ഞത് അങ്ങനെ തന്നെയാണ്. സമയം കിട്ടിയാല്‍ കൂടുതല്‍ ഭംഗിയായി പറയുമായിരുന്നു. ഇനിയും പറയും. നിയമസഭയില്‍ എം എല്‍ എ ആയിരിക്കുന്നവര്‍ സര്‍ക്കാരിനെ പറഞ്ഞാല്‍ തിരിച്ചുപറയുന്നതും കേള്‍ക്കണമല്ലോ'-എന്നാണ് എം എം മണി തൊടുപുഴയില്‍ മാധ്യമപ്രവര്‍ത്തകരോട് പറഞ്ഞത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
രാഷ്ട്രീയ സംവാദങ്ങള്‍ക്കും ചോദ്യങ്ങള്‍ക്കുമുളള മറുപടിയായി വ്യക്തികളുടെ, പ്രത്യേകിച്ച് സ്ത്രീകളുടെ ജീവിതത്തില്‍ ഉണ്ടാവുന്ന ട്രാജഡികളെ ഉപയോഗപ്പെടുത്തുന്നത് അങ്ങേയറ്റം അപലപനീയമാണ്. ഇത്തരം പരാമര്‍ശങ്ങള്‍ ഇടതുപക്ഷത്തിന്റെയും കമ്മ്യൂണിസ്റ്റുകാരുടെയും ഭാഗത്തുനിന്ന് ഉണ്ടാവാന്‍ പാടില്ലാത്തതാണ്. അത് തീര്‍ച്ചയായും ഒഴിവാക്കപ്പെടേണ്ടതാണ് എന്നായിരുന്നു ആനി രാജ പറഞ്ഞത്.
