പാലക്കാട്: ആരും തന്നെ അനുകരിക്കരുതെന്ന് പാലക്കാട് മലകയറിയ ബാബു. ഇതുപോലെ ഇനി ആരും ആവര്ത്തിക്കരുതെന്നും അഥവാ പോകുന്നുണ്ടെങ്കില് വെള്ളമടക്കം സാധനങ്ങള് കയ്യില് കരുതി എല്ലാ സുരക്ഷാ ക്രമീകരണങ്ങളും പാലിച്ചുവേണം പോകാന് എന്നും പെര്മിഷന് എടുക്കണമെന്നും ബാബു പറഞ്ഞു. ആശുപത്രിയില് നിന്ന് ഡിസ്ചാര്ജ്ജ് ആയതിനുശേഷം മാധ്യമപ്രവര്ത്തകരോട് അനുഭവങ്ങള് പങ്കുവെക്കവെയാണ് ബാബു ഇക്കാര്യം പറഞ്ഞത്.
'സുഹൃത്തുക്കളുമൊത്താണ് രാവിലെ മലകയറാന് പോയത്. മല കയറി പാതിവഴിയെത്തിയപ്പോള് കൂടെയുണ്ടായിരുന്നവര് ദാഹിക്കുന്നു എന്നുപറഞ്ഞ് താഴെയിറങ്ങി. ഞാന് പക്ഷേ മല കയറ്റം മുഴുവനാക്കി മടങ്ങിവരാം എന്ന് പറഞ്ഞ് കയറ്റം തുടരുകയായിരുന്നു. അവര് താഴെയെത്തിക്കഴിഞ്ഞപ്പോഴാണ് ഞാന് സ്ലിപ്പായി വീഴുന്നത്. വീണയിടത്തുതന്നെ ഇരുന്നു. ഫയര്ഫോഴ്സുകാരെ വിളിച്ചു. എസ് ഐക്കും സുഹൃത്തുക്കള്ക്കും വാട്ട്സാപ്പിലൂടെ എവിടെയാണ് താനുളളത് എന്ന് വ്യക്തമാക്കുന്ന ഫോട്ടോകള് അയച്ചുകൊടുത്തു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കാലുളുക്കിയിരുന്നു അതുകൊണ്ട് താഴെക്കിറങ്ങാനുളള ശ്രമം നടത്തരുതെന്ന് അവര് നിര്ദേശം നല്കി. മുകളിലേക്ക് കയറാന് സാധിക്കില്ലെന്നതുകൊണ്ട് സുരക്ഷിതമായി ഇരിക്കാനുളള സ്ഥലം തിരയുകയായിരുന്നു. മരണഭയമൊന്നുമില്ലായിരുന്നു. എനിക്ക് ധൈര്യമുണ്ടായിരുന്നു. സാധാരണ മലകള് കയറാറുണ്ട്. 45 മണിക്കൂറും ഉറങ്ങിയിരുന്നില്ല. അഞ്ചോ പത്തോ സെക്കന്റുകള് കണ്ണടച്ചിരിക്കുമായിരുന്നു. പക്ഷേ ഉറങ്ങിയാല് വീണുപോകുമെന്ന ബോധ്യമുണ്ടായിരുന്നു. രക്ഷപ്പെടുമെന്ന് വിശ്വാസമുണ്ടായിരുന്നു. അനുവാദം ലഭിച്ചാല് ഇനിയും മല കയറും' -ബാബു പറഞ്ഞു.