കാസര്ഗോഡ്: കൃഷിക്ക് യോഗ്യമായ ഒരു ഏക്കര് സ്ഥലം നല്കണമെന്ന് ആവശ്യപ്പെട്ട് കാസര്ഗോഡ് കളക്ട്രേറ്റില് ആദിവാസികളുടെ സമരം. ഗോത്രജനത കൂട്ടായ്മയുടെ നേതൃത്വത്തിലാണ് പ്രതിഷേധം സംഘടിപ്പിച്ചത്. സ്ത്രീകളും കുട്ടികളും അടക്കം നിരവധി പേരാണ് സമരത്തില് പങ്കെടുത്തത്. ആദിവാസികൾക്ക് ഒരേക്കർ വീതം കൃഷി ഭൂമി വിതരണം ചെയ്യണമെന്ന് ആവശ്യപ്പെട്ട് ഇതിന് മുന്പും ഗോത്ര ജനതാ കൂട്ടായ്മ കലക്ട്രേറ്റ് ഉപരോധിച്ചിരുന്നു. ജില്ലാ ട്രൈബൽ ഡെവലപ്മെന്റ് ഓഫീസർ അന്ന് നൽകിയ ഉറപ്പ് പാലിക്കാതെ വന്നതോടെയാണ് പ്രതിഷേധവുമായി ഗോത്ര ജനത കൂട്ടായ്മ രംഗത്തെത്തിയത്.
കളക്ട്രേറ്റിന് മുന്പിലെ പ്രതിഷേധം ശക്തമായതോടെ പ്രതിഷേധക്കാരെ കളക്ടര് ചര്ച്ചക്ക് വിളിച്ചു. അര്ഹരായവര്ക്ക് കൃഷി ഭൂമി നല്കുമെന്ന് കളക്ടര് ഉറപ്പ് നല്കി. ഭൂരഹിത പട്ടിക വർഗക്കാർക്ക് ഭൂമി ലഭ്യമാക്കുന്നതിന് കൃഷിയോഗ്യവും വാസയോഗ്യവുമായ ലാൻഡ് ബാങ്കിലേക്ക് ഭൂമി ലഭ്യമാക്കുന്നതിന് വേണ്ട നടപടി ഉടന് ആരംഭിക്കുമെന്നും ജില്ലാ കലക്ടർ സമരക്കാരെ അറിയിച്ചു. കളക്ടറിന്റെ ഉറപ്പിന് മേല് പ്രതിഷേധക്കാര് സമരം അവസാനിപ്പിച്ചിരിക്കുകയാണ്.