വിഷ്ണു ഉണ്ണികൃഷ്ണൻ നായകനാകുന്ന പുതിയ ചിത്രം രണ്ടിന്റെ ടീസർ പുറത്തുവിട്ടു. രഞ്ജിത്ത്, അജയ് വാസുദേവ്, നാദിർഷ, അരുൺ ഗോപി എന്നിവരുടെ എഫ്ബി പേജുകളിലൂടെയാണ് റിലീസായത്.
സമകാലിക രാഷ്ട്രീയ സംഭവങ്ങളെ കുറിച്ചായിരിക്കും ചിത്രം സംസാരിക്കുക എന്ന് ഉറപ്പ് നൽകുന്നതാണ് ടീസർ. വിഷ്ണു ഉണ്ണികൃഷ്ണന് പുറമെ ഗോകുലനെയും സുധി കോപ്പയെയും ടീസറിൽ കാണാം. വാവ എന്ന നാട്ടിൻപുറത്തെ ചെറുപ്പക്കാരനായിട്ടാണ് വിഷ്ണു ഉണ്ണികൃഷ്ണൻ ചിത്രത്തില്‍ അഭിനയിക്കുന്നത്. രേഷ്മ രാജനാണ് നായിക.
നായകന്‍ ഗോകുലന്‍ അഭിനയിക്കുന്ന കഥാപാത്രത്തോട് 'നിന്റെ തന്തേടെ വകയാണോ ഇന്ത്യ... എനിക്കും നിനക്കുമൊക്കെ ഒരേ അവകാശമാണ് ഉള്ളത്' എന്ന് പറയുന്ന ഭാഗമാണ് ടീസറിലെ ഹൈലൈറ്റ്.
നവാഗതനായ സുജിത്ത് ലാലാണ് ചിത്രം സംവിധാനം ചെയ്യുന്നത്. ഫൈനൽസിനു ശേഷം ഹെവൻലി മൂവീസിന്റെ ബാനറിൽ പ്രജീവ് സത്യവ്രതനാണ് ചിത്രം നിർമ്മിക്കുന്നത്. തിരക്കഥ ഒരുക്കുന്നത് ബിനുലാൽ ഉണ്ണി. റഫീഖ് അഹമ്മദിന്റെ വരികള്‍ക്ക് ബിജിബാലാണ് സംഗീതം. ചിത്രത്തിന്റെ ഫസ്റ്റ്‌ലുക്ക് പോസ്റ്റര്‍ മോഹന്‍ലാലും മമ്മൂട്ടിയും തങ്ങളുടെ ഫേസ്ബുക്ക് പേജിലൂടെ പുറത്തുവിട്ടിരുന്നു.
