മലയാളി വീട്ടമ്മമാരെയും പുരുഷന്മാരെയും ഒന്നിരുത്തി ചിന്തിപ്പിച്ച ഗ്രേറ്റ് ഇന്ത്യന്‍ കിച്ചന്‍ അഥവാ മഹത്തായ ഭാരതീയ അടുക്കള തമിഴിലേക്ക്. സുരാജ് വെഞ്ഞാറമൂടിനെയും നിമിഷ സജയനെയും പ്രധാന കഥാപാത്രങ്ങളാക്കി ജിയോ ബേബി സംവിധാനം ചെയ്ത ചിത്രത്തിന്റെ തമിഴ് റീമേക്കില്‍ ഐശ്വര്യാ രാജേഷാണ് നായിക.
ചിത്രം തമിഴില്‍ സംവിധാനം ചെയ്യുന്നത് ജയം കൊണ്ടേന്‍, സേട്ടെ തുടങ്ങിയ ചിത്രങ്ങളിലൂടെ ശ്രദ്ധേയനായ ആര്‍ കണ്ണനാണ്. ചിത്രത്തിലെ മറ്റു താരങ്ങളുടെ വിവരങ്ങള്‍ പുറത്തുവിട്ടിട്ടില്ല. ഒടിടി റിലീസായി പ്രദര്‍ശനത്തിനെത്തിയ ചിത്രം കേരളത്തില്‍ മികച്ച പ്രതികരണമാണ് നേടിയത്.
കിലോമീറ്റേഴ്‌സ് ആന്‍ഡ് കിലോമീറ്റേഴ്‌സ് എന്ന ചിത്രത്തിനുശേഷം ജിയോ ബേബി സംവിധാനം ചെയ്ത ചിത്രമാണ് ദി ഗ്രേറ്റ് ഇന്ത്യന്‍ കിച്ചന്‍. തൊണ്ടിമുതലും ദൃസാക്ഷിയും എന്ന ചിത്രത്തിനുശേഷം നിമിഷയും സുരാജും ഒന്നിച്ച ചിത്രംകൂടിയാണ് ഗ്രേറ്റ് ഇന്ത്യന്‍ കിച്ചന്‍.
