കൊച്ചി: നിങ്ങള്‍ നാലുപേര്‍ മാത്രമാണോ കൊച്ചിക്കുവേണ്ടി, ഞങ്ങളെല്ലാം ആഫ്രിക്കക്ക് വേണ്ടിയുള്ളവരാണോ? പൊതുമരാമത്ത് മന്ത്രി ജി സുധാകരന്റെതാണ് ചോദ്യം. വൈറ്റില പാലം ഔദ്യൊഗികമായി ഉദ്ഘാടനം ചെയ്യുന്നതിന് മുന്‍പ് തുറന്നു കൊടുത്ത വി ഫോര്‍ കൊച്ചി എന്ന സംഘടനയെ ഉദ്ദേശിച്ചാണ് മന്ത്രി സുധാകരന്റെ പരാമര്‍ശം. ഏറണാകുളത്ത് വൈറ്റില മേല്‍പ്പാലം ഉദ്ഘാടന ചടങ്ങില്‍ സംസാരിക്കുകയായിരുന്നു മന്ത്രി. ഉന്മാദാവസ്ഥയില്‍ രാത്രി വന്ന് കോപ്രായം കാണിക്കുന്നവരല്ല കൊച്ചി ഭരിക്കുന്നത്. കേന്ദ്ര സംസ്ഥാന സര്‍ക്കാരുകളും ജനപ്രതിനിധികളുമാണ് - മന്ത്രി പറഞ്ഞു.
പ്രധാനമന്ത്രി നരേന്ദ്ര മോദി ആഗ്രഹം പ്രകടിപ്പിച്ചത് പ്രകാരം ഉദ്ഘാടനം മാറ്റിവെച്ച ആലപ്പുഴ ബൈപ്പാസില്‍ ആരും കയറാത്തതെന്താണ് എന്ന് പൊതുമരാമത്ത് മന്ത്രി ജി സുധാകരന്‍ ചോദിച്ചു. ആലപ്പുഴ ബൈപ്പാസ് പണി പൂര്‍ത്തിയായിട്ട് ഒരു മാസമായി. ഉദ്ഘാടനത്തിന് കാത്തുനില്‍ക്കുന്നതൊക്കെ നാട്ടു നടപ്പാണ്-മന്ത്രി ജി സുധാകരന്‍ കൂട്ടിച്ചേര്‍ത്തു. പാലാരിവട്ടം പാലത്തിനുണ്ടായതുപോലെ വൈറ്റില പാലത്തിനും കുഴപ്പമുണ്ടാക്കുക എന്നതായിരുന്നു തത്പ്പര കക്ഷികളുടെ ലക്ഷ്യമെന്നും മന്ത്രി ആരോപിച്ചു.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
കിഫ്ബിയിലൂടെ 113 കോടി രൂപ അനുവദിച്ച വൈറ്റില മേല്‍പ്പാലം ഒടുവില്‍ 87 കോടി രൂപയിലാണ് നിര്‍മ്മാണം പൂര്‍ത്തിയായത് എന്ന് പൊതുമരാമത്ത് മന്ത്രി പറഞ്ഞു. എല്ലാ തരത്തിലുള്ള പരിശോധനകള്‍ക്കും ശേഷമാണ് വൈറ്റില മേല്‍പ്പാലം തുറന്നു കൊടുക്കുന്നത്. താന്‍ സ്വയം 34 തവണ പരിശോധനയില്‍ പങ്കാളിയായിട്ടുണ്ടെന്നും അത് തന്റെ കര്‍മ്മമാണെന്നും പൊതുമരാമത്ത് മന്ത്രി ജി സുധാകരന്‍ മേല്‍പ്പാലത്തിന്റെ ഉദ്ഘാടന ചടങ്ങില്‍ പറഞ്ഞു.
