ഇസ്ലാമാബാദ്: പാകിസ്താന്‍ പ്രതിപക്ഷ നേതാവും പാക് മുസ്ലിം ലീഗ് പ്രസിഡന്റുമായ ഷഹബാസ് ഷെരീഫിനെ അഴിമതി വിരുദ്ധ സ്ക്വാഡ് അറസ്റ്റു ചെയ്തു. 700 കോടി രൂപയുടെ കള്ളപ്പണം വെളുപ്പിച്ചു എന്നാ കേസിലാണ് അറസ്റ്റ്. കോടതിയില്‍ സമര്‍പ്പിച്ച മുന്‍‌കൂര്‍ ജാമ്യ ഹര്‍ജി തള്ളിയതിനെ തുടര്‍ന്നാണ്‌ നാഷണല്‍ അക്കൌണ്ടബിറ്റി ബ്യൂറോ ഷഹബാസ് ഷെരീഫിനെ അറസ്റ്റു ചെയതത്. മുന്‍ പാക് പ്രധാനമന്ത്രി നവാസ് ഷെരീഫിന്റെ സഹോദരനും പാക് പഞ്ചാബ് മുന്‍ മുഖ്യമന്ത്രിയുമാണ് ഷഹബാസ്.
തന്നെ ജയിലിലടയ്ക്കാനുള്ള പ്രധാനമന്ത്രി ഇമ്രാന്‍ ഖാന്റെ കുത്സിത നീക്കമാണ് അറസ്റ്റിനു പിന്നിലെന്ന് ഷഹബാസ് ഷെരീഫ് ആരോപിച്ചു. ഇമ്രാന്‍ ഖാന്റെയും നാഷണല്‍ അക്കൌണ്ടബിറ്റി ബ്യൂറോയുടെയും അവിശുദ്ധ കൂട്ടുകെട്ടാണ് ഇതിലേക്ക് നയിച്ചതെന്നും അദ്ദേഹം ആരോപിച്ചു. പി പി പി നേതാവ് ബിലാവല്‍ ഭൂട്ടോയും അറസ്റ്റില്‍ പ്രതിഷേധിച്ചു.
