കോട്ടയം: കോട്ടയത്ത് പക്ഷിപ്പനി സ്ഥിരീകരിച്ചു. മൃഗസംരക്ഷണ വകുപ്പിന്റെ മണര്കാട് പ്രാദേശിക കോഴി വളര്ത്തല് കേന്ദ്രത്തിലാണ് പക്ഷിപ്പനി സ്ഥിരീകരിച്ചത്. ഒന്പതിനായിരം കോഴികളാണ് ഫാമിലുളളത്. കോഴികള് കൂട്ടത്തോടെ ചത്തതിനുപിന്നാലെ ഭോപ്പാലിലെ നാഷണല് ഇന്സ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമല് ഡിസീസസ് ലാബില് നടത്തിയ പരിശോധനയിലാണ് H5 N1 സ്ഥിരീകരിച്ചത്. പക്ഷിപ്പനി കണ്ടെത്തിയ സ്ഥലത്തിന് ഒരു കിലോമീറ്റര് ചുറ്റളവിലുളള പ്രദേശങ്ങള് പക്ഷിപ്പനി ബാധിത മേഖലയായി പ്രഖ്യാപിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഒരു കിലോമീറ്റര് ചുറ്റളവിലുളള എല്ലാ വളര്ത്തുപക്ഷികളെയും മൃഗസംരക്ഷണ വകുപ്പിന്റെ മേല്നോട്ടത്തില് അടിയന്തരമായി കൊന്നൊടുക്കി ശാസ്ത്രീയമായി സംസ്കരിക്കും. മണര്കാട് പഞ്ചായത്തിലെ 12,13,14 വാര്ഡുകളിലെയും പുതുപ്പളളി പഞ്ചായത്തിലെ 2,3 വാര്ഡുകളിലെയും കോഴി, താറാവ്, കാട തുടങ്ങിയവയുടെ മുട്ട, ഇറച്ചി, കാഷ്ഠം തുടങ്ങിയ ഉല്പ്പന്നങ്ങളുടെ വില്പ്പന ഇനിയൊരു അറിയിപ്പുണ്ടാകുന്നതു വരെ പൂര്ണമായി നിരോധിച്ചു. പക്ഷിപ്പനി സ്ഥിരീകരിച്ച സ്ഥലത്തിന്റെ 10 കിലോമീറ്റര് ചുറ്റളവ് നിരീക്ഷണ മേഖലയായി പ്രഖ്യാപിച്ചിട്ടുണ്ട്.