തിരുവനന്തപുരം: വംശവെറി പരാമര്‍ശത്തില്‍ കലാമണ്ഡലം സത്യഭാമയ്‌ക്കെതിരെ മനുഷ്യാവകാശ കമ്മീഷന്‍ കേസെടുത്തു. തൃശൂര്‍ എസ്പിയും സാംസ്‌കാരിക വകുപ്പ് സെക്രട്ടറിയും പരാമര്‍ശം പരിശോധിച്ച് 15 ദിവസങ്ങള്‍ക്കുളളില്‍ റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ അംഗം വി കെ ബീനാ കുമാരി നിര്‍ദേശിച്ചു. മാധ്യമ വാര്‍ത്തകളുടെ അടിസ്ഥാനത്തില്‍ മനുഷ്യാവകാശ കമ്മീഷന്‍ സ്വമേധയാ ആണ് കേസെടുത്തത്. മനുഷ്യാവകാശ പ്രവര്‍ത്തകന്‍ ഗിന്നസ് മാടസാമിയും വിഷയത്തില്‍ പരാതി നല്‍കിയിരുന്നു.
പുരുഷന്മാര്‍ മോഹിനിയാട്ടം കളിക്കുന്നത് അരോചകമാണെന്നും അയാള്‍ക്ക് കാക്കയുടെ നിറമാണെന്നുമായിരുന്നു കലാമണ്ഡലം സത്യഭാമ ഒരു യൂട്യൂബ് ചാനലിന് നല്‍കിയ അഭിമുഖത്തില്‍ പറഞ്ഞത്. 'മോഹിനിയാകണം മോഹിനിയാട്ടം കളിക്കുന്നത്. ഇയാളെ കണ്ട് കഴിഞ്ഞാല്‍ കാക്കയുടെ നിറം. കാലകത്തിവെച്ച് കളിക്കുന്നതാണ് മോഹിനിയാട്ടം. ഒരു പുരുഷന്‍ കാലകത്തിവെച്ച് മോഹിനിയാട്ടം കളിക്കുക എന്ന് പറഞ്ഞാല്‍ അതിലും അരോചകമായി വേറൊന്നുമില്ല. എന്റെ അഭിപ്രായത്തില്‍ പുരുഷന്മാര്‍ മോഹിനിയാട്ടം കളിക്കുകയാണെങ്കില്‍ അവര്‍ക്ക് അതുപോലെ സൗന്ദര്യം വേണം. ആണ്‍പിളേളരില്‍ നല്ല സൗന്ദര്യമുളളവര്‍ ഇല്ലേ. ഇവനെ കണ്ടാല്‍ ദൈവം പോലും, പെറ്റ തളള പോലും സഹിക്കില്ല'- എന്നായിരുന്നു സത്യഭാമയുടെ വിവാദ പരാമര്‍ശം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സത്യഭാമയുടെ പരാമര്‍ശങ്ങള്‍ തളളി കേരളാ കലാമണ്ഡലം പത്രക്കുറിപ്പിറക്കിയിരുന്നു. സത്യഭാമയുടെ പ്രതികരണങ്ങളെ പൂര്‍ണ്ണമായും നിരാകരിക്കുകയും അപലപിക്കുകയും ചെയ്യുന്നു. ഒരു പരിഷ്‌കൃത സമൂഹത്തിന് നിരക്കാത്ത ഇത്തരം പ്രസ്താവനകള്‍ നടത്തുന്ന വ്യക്തികളുടെ പേരിനൊപ്പം കലാമണ്ഡലത്തിന്റെ പേര് ചേര്‍ക്കപ്പെടുന്നത് സ്ഥാപനത്തിന് കളങ്കമാണ്. കേരള കലാമണ്ഡലത്തിലെ ഒരു പൂര്‍വ്വവിദ്യാര്‍ത്ഥി എന്നതിനപ്പുറം അവര്‍ക്ക് കലാമണ്ഡലവുമായി നിലവില്‍ ഒരു ബന്ധവുമില്ല'- എന്നാണ് കേരളാ കലാമണ്ഡലം പുറത്തിറക്കിയ പ്രസ്താവനയില്‍ പറഞ്ഞത്.
