ഡല്‍ഹി: ലോക്‌സഭാ തെരഞ്ഞെടുപ്പില്‍ രാഹുല്‍ ഗാന്ധി വയനാട്ടില്‍നിന്ന് മത്സരിക്കുന്നതിനെ എതിര്‍ക്കില്ലെന്ന് സി പി ഐ ദേശീയ നേതൃത്വം. പലര്‍ക്കും വ്യത്യസ്ത അഭിപ്രായങ്ങളുണ്ടാകുമെന്നും സ്ഥാനാര്‍ത്ഥിയെ തീരുമാനിക്കാന്‍ ഓരോ പാര്‍ട്ടിക്കും അവകാശമുണ്ടെന്നും സി പി ഐ ദേശീയ ജനറല്‍ സെക്രട്ടറി ഡി രാജ പറഞ്ഞു.
'ഓരോ സംസ്ഥാനങ്ങളിലെയും സാഹചര്യം വ്യത്യസ്തമാണ്. പലര്‍ക്കും പല അഭിപ്രായങ്ങളുണ്ടാകും. സ്ഥാനാര്‍ത്ഥിയെ തീരുമാനിക്കാന്‍ പാര്‍ട്ടികള്‍ക്ക് അവകാശമുണ്ട്. തെരഞ്ഞെടുപ്പിനോട് അടുക്കുമ്പോള്‍ മാത്രമേ സ്ഥാനാര്‍ത്ഥി നിര്‍ണയം ചര്‍ച്ചയാവുകയുളളു. ബിജെപിയെ തോല്‍പ്പിക്കുകയെന്നതാണ് ഇന്ത്യാ മുന്നണിയുടെ ലക്ഷ്യം'- ഡി രാജ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
വരാനിരിക്കുന്ന ലോക്‌സഭാ തെരഞ്ഞെടുപ്പില്‍ രാഹുല്‍ ഗാന്ധി വയനാട്ടില്‍നിന്ന് മത്സരിക്കുന്നതിനെതിരെ സി പി ഐ സംസ്ഥാന നേതൃത്വം നേരത്തെ രംഗത്തെത്തിയിരുന്നു. പ്രതിപക്ഷ കക്ഷികള്‍ ഒന്നിച്ച് സഖ്യം രൂപീകരിച്ച പശ്ചാത്തലത്തില്‍ രാഹുല്‍ ഗാന്ധി സി പി ഐയ്‌ക്കെതിരെ മത്സരിക്കുന്നത് തെറ്റായ സന്ദേശം നല്‍കുമെന്നും ഒരു കാരണവശാലും രാഹുല്‍ വയനാട്ടില്‍ നിന്ന് മത്സരിക്കരുതെന്നുമാണ് പി സന്തോഷ് കുമാര്‍ എംപി പറഞ്ഞത്.
