ഡല്ഹി: വധശ്രമക്കേസില് ലക്ഷദ്വീപ് എംപി മുഹമ്മദ് ഫൈസല് കുറ്റക്കാരനെന്ന വിധി സ്റ്റേ ചെയ്ത ഹൈക്കോടതി വിധി സുപ്രീംകോടതി റദ്ദാക്കി. കേസ് വീണ്ടും പരിഗണിച്ച് ആറ് ആഴ്ച്ചകള്ക്കുളളില് തീര്പ്പുകല്പ്പിക്കാന് സുപ്രീംകോടതി ഹൈക്കോടതിക്ക് നിര്ദേശം നല്കി. ഹൈക്കോടതി വിധി വരുന്നതുവരെ മുഹമ്മദ് ഫൈസലിന് എംപി സ്ഥാനത്ത് തുടരാമെന്നും കോടതി വ്യക്തമാക്കി.
ലക്ഷദ്വീപ് ഭരണകൂടത്തിന്റെ അപ്പീലിലാണ് സുപ്രീംകോടതി ഇടപെടല് നടത്തിയത്. കവരത്തി ജില്ലാ സെഷന്സ് കോടതിയാണ് വധശ്രമക്കേസില് ഫൈസല് കുറ്റക്കാരനാണെന്ന് വിധിച്ചത്. പത്തുവര്ഷത്തെ തടവും കോടതി വിധിച്ചിരുന്നു. എന്നാല് എംപിയെന്ന കാരണം ചൂണ്ടിക്കാട്ടി ഹൈക്കോടതി കീഴ്ക്കോടതി വിധി സ്റ്റേ ചെയ്തു. ഇതോടെ ഫൈസലിന് എംപി സ്ഥാനം നിലനിര്ത്താന് കഴിഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2009-ല് കോണ്ഗ്രസ് പ്രവര്ത്തകനെ വധിക്കാന് ശ്രമിച്ച കേസിലാണ് മുഹമ്മദ് ഫൈസലിന് കോടതി പത്തുവര്ഷം തടവുശിക്ഷ വിധിച്ചത്. 2009-ല് നടന്ന ലോക്സഭാ തെരഞ്ഞെടുപ്പ് പ്രചാരണത്തിനിടെ ഒരു ഷെഡ് സ്ഥാപിച്ചതുമായി ബന്ധപ്പെട്ടുണ്ടായ സംഘര്ഷത്തില് മുഹമ്മദ് സാലിഹ് എന്ന കോണ്ഗ്രസ് പ്രവര്ത്തകനെ ആക്രമിച്ച് പരിക്കേല്പ്പിച്ചു എന്നാണ് കേസ്. മുന് കേന്ദ്രമന്ത്രിയും കോണ്ഗ്രസ് നേതാവുമായ പി എം സയ്യിദിന്റെ മകളുടെ ഭര്ത്താവാണ് സാലിഹ്.