ഡല്‍ഹി: ഏക സിവില്‍ കോഡ് വിഷയം ചര്‍ച്ച ചെയ്യാന്‍ കോണ്‍ഗ്രസ് നിയോഗിച്ച സമിതി യോഗം ചേര്‍ന്നു. ഏക സിവില്‍ കോഡ് വിഷയത്തില്‍ സൂഷ്മതയോടെ പ്രതികരണങ്ങള്‍ നടത്തിയാല്‍ മതിയെന്നും കരട് ബില്‍ വന്നതിനുശേഷം നിലപാട് വ്യക്തമാക്കിയാല്‍ മതിയെന്നുമാണ് സമിതിയുടെ നിര്‍ദേശം. മുന്‍ കേന്ദ്ര ധനകാര്യ മന്ത്രിയും കോണ്‍ഗ്രസ് പ്രവര്‍ത്തക സമിതി അംഗവുമായ പി ചിദംബരം അധ്യക്ഷനായ ബെഞ്ചാണ് ഏക സിവില്‍ കോഡ് ചര്‍ച്ച ചെയ്തത്. സല്‍മാന്‍ ഖുര്‍ഷിദ്, മനു അഭിഷേഖ് സിഖ്‌വി, മനീഷ് തിവാരി, വിവേക് തന്‍ഖ, കെടിഎസ്, തുളസി തുടങ്ങിവരാണ് സമിതിയിലെ മറ്റ് അംഗങ്ങള്‍. തങ്ങളുടെ നിര്‍ദേശങ്ങള്‍ ഇവര്‍ കോണ്‍ഗ്രസ് അധ്യക്ഷന്‍ മല്ലികാര്‍ജ്ജുന്‍ ഖാര്‍ഗെക്ക് കൈമാറും.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഏക സിവില്‍ കോഡ് വിഷയത്തില്‍ ദേശീയതലത്തില്‍ ഒരു നിലപാട് പ്രഖ്യാപിക്കാന്‍ കോണ്‍ഗ്രസ് ഇതുവരെ തയാറായിട്ടില്ല. ഇത് കേരളമടക്കം പല സംസ്ഥാന നേതൃത്വങ്ങളെയും പ്രതിസന്ധിയിലാക്കിയിട്ടുണ്ട്. സിപിഎം ഉള്‍പ്പെടെ പല പ്രതിപക്ഷ പാര്‍ട്ടികളും ഇത് സംബന്ധിച്ച് നിലപാടുകളും പ്രവര്‍ത്തങ്ങളും സജീവമാക്കിയ പശ്ചാത്തലത്തില്‍ കേന്ദ്ര നേതൃത്വത്തിനെതിരെ വിമര്‍ശനം പാര്‍ട്ടിക്കകത്ത് ശക്തമാണ്. ഈ പശ്ചാത്തലത്തിലാണ് ഉപസമിതി രൂപീകരിച്ച് വിഷയത്തില്‍ വ്യക്തത വരുത്താന്‍ ദേശീയ അധ്യക്ഷന്‍ മല്ലികാര്‍ജ്ജുന്‍ ഖാര്‍ഗെയുടെ നേതൃത്വത്തില്‍ ശ്രമമാരംഭിച്ചത്. ഏക സിവില്‍ കോഡ് വിഷയത്തില്‍ എത്രയും പെട്ടെന്ന് ഒരു നിലപാട് കൈക്കൊള്ളുക എന്നതാണ് കോണ്‍ഗ്രസ് ലക്ഷ്യം വെയ്ക്കുന്നത്. ഉപസമിതിയുടെ പഠനശേഷം വരുന്ന റിപ്പോര്‍ട്ടിന്‍റെ അടിസ്ഥാനത്തില്‍ നടക്കുന്ന ചര്‍ച്ചയിലാണ് നിലപാട് കൈക്കൊള്ളുക.
