കൊച്ചി: സമസ്തയെ പുകഴ്ത്തി സിപിഎം പൊളിറ്റ് ബ്യൂറോ അംഗം എം എ ബേബി. സമചിത്തതയും പക്വതയും പ്രകടിപ്പിക്കുന്ന സംഘടനയാണ് സമസ്തയെന്നും ന്യൂനപക്ഷ മതവിഭാഗത്തില്പ്പെട്ടവര് വര്ഗീയവത്കരിക്കപ്പെടാതെ നിര്ത്തുന്ന പ്രവര്ത്തന ശൈലിയാണ് സമസ്തയുടേതെന്നും എം എ ബേബി പറഞ്ഞു. വിശാല ഐക്യം രൂപപ്പെടുത്തേണ്ട സമയത്ത് പ്രതിപക്ഷ നേതാവ് വിഡി സതീശന് സിപിഎമ്മിനിട്ട് കുത്തുകയാണെന്നും ഏക സിവില് കോഡ് വിഷയത്തില് സിപിഎമ്മിന് ലോ കമ്മീഷന്റെ നിലപാടാണെന്നും അദ്ദേഹം പറഞ്ഞു. മീഡിയാ വണ്ണിന് നല്കിയ അഭിമുഖത്തിലായിരുന്നു എം എ ബേബിയുടെ പ്രതികരണം.
'നല്ല നിലയില് പ്രവര്ത്തിക്കുന്ന സംഘടനയാണ് സമസ്ത. വളരെ സമചിത്തതയും പക്വതയും പ്രകടിപ്പിക്കുന്ന സംഘടനയാണ്. ഏക സിവില് കോഡ് ആവശ്യമില്ലെന്ന ലോ കമ്മീഷന്റെ നിലപാടുതന്നെയാണ് സിപിഎമ്മിനും. വ്യക്തിനിയമങ്ങളില് പരിഷ്കാരം വേണം. സ്ത്രീതുല്യത വേണം. എന്നാല് ഇപ്പോഴത്തെ ആര്എസ്എസിന്റെ പദ്ധതി അംഗീകരിക്കാനാവില്ല'- എം എ ബേബി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
സിപിഎമ്മും ബിജെപിയും ഒരുപോലെയാണെന്ന് പറയാന് വിഡി സതീശന് എങ്ങനെ സാധിക്കുന്നുവെന്നും എം എ ബേബി ചോദിച്ചു. വിശാല ഐക്യം രൂപപ്പെടുത്തേണ്ട സമയത്ത് സതീശന് സിപിഎമ്മിനിട്ട് കുത്തുകയാണെന്നും സതീശന്റെ പാര്ട്ടി ആദ്യം ഏക സിവില് കോഡ് വിഷയത്തില് നിലപാട് രൂപീകരിക്കട്ടെയെന്നും അദ്ദേഹം കൂട്ടിച്ചേര്ത്തു.