കൊച്ചി: മാത്യൂ തോമസും നസ്ലിന്‍ ഗഫൂര്‍ എന്നിവര്‍ ഒന്നിക്കുന്ന പുതിയ ചിത്രം '18 പ്ലസ്' ട്രെയിലര്‍ പുറത്തിറങ്ങി. നസ്ലിന്‍ നായകനായി എത്തുന്ന ആദ്യ ചിത്രം കൂടിയാണിത്‌. റോമാന്‍റിക് കോമഡി എന്റര്‍ടെയ്നറായാണ് ചിത്രം ഒരുക്കിയത്. ജോ ആന്‍ഡ് ജോ എന്ന ഹിറ്റ് ചിത്രത്തിന് ശേഷം അരുണ്‍ ഡി ജോസ് സംവിധാനം ചെയ്യുന്ന ചിത്രമാണിത്. കണ്ണൂര്‍ പശ്ചാത്തലമായാണ് ചിത്രം ഒരുക്കിയിരിക്കുന്നത്. കൗമാരക്കാരുടെ പ്രണയവും ഒളിച്ചോട്ടവുമാണ് ചിത്രത്തില്‍ പറയുന്നത്.
യുവ മനസ്സുകളുടെ പ്രസരിപ്പാർന്ന ജീവിതം പറയുന്ന ചിത്രത്തിൽ സോഷ്യൽമീഡിയയിലൂടെ ശ്രദ്ധേയരായ സാഫ് സഹോദരങ്ങളും ചിത്രത്തില്‍ പ്രധാനവേഷത്തില്‍ എത്തുന്നു. ബിനു പപ്പു, സാഫ് ബ്രോസ്, മീനാക്ഷി, മനോജ് കെ യു, ശ്യാം മോഹന്‍, കുമാര്‍ സുനില്‍, ബാബു അന്നൂര്‍, ഉണ്ണിരാജ, പ്രിയ തുടങ്ങിയവരാണ് മറ്റു പ്രധാന വേഷങ്ങളില്‍ എത്തുന്നത്. മാറ്റം ഒഴിവാക്കാനാവാത്തതാണ് എന്ന ടാഗ് ലൈനിലാണ് സിനിമയ്ക്ക് നല്‍കിയിരിക്കുന്നത്. ഫലൂദ എന്റര്‍ടെയ്ന്‍മെന്റ്‌സിന്റെ ബാനറില്‍ ആണ് ചിത്രം നിര്‍മ്മിക്കുന്നത്.
