ഡല്‍ഹി: ഹിന്‍ഡര്‍ബര്‍ഗ് വെളിപ്പെടുത്തലിന്റെ പശ്ചാത്തലത്തില്‍ ഇന്ത്യന്‍ വ്യവസായി ഗൌതം അദാനിക്കെതിരെ പ്രഖ്യാപിച്ച അന്വേഷണത്തിന് ആറുമാസം അനുവദിക്കണമെന്ന ആവശ്യം സുപ്രീം കോടതി തള്ളി. സെക്യൂരിറ്റീസ് ആന്‍ഡ് എക്സ്ചേഞ്ച് ബോര്‍ഡ് ഓഫ് ഇന്ത്യ (സെബി) നല്‍കിയ ഹര്‍ജിയാണ് സുപ്രീം കോടതി തള്ളിയത്. ഓഹരി ക്ഷണിച്ചതില്‍ കൃത്രിമം കാണിച്ചു, കമ്പനിയുടെ ആസ്തി പെരുപ്പിച്ചുകാണിച്ചു തുടങ്ങി നിരവധി ആരോപണങ്ങളാണ് അദാനിയുടെ കമ്പനിക്കെതിരെ ഹിന്‍ഡര്‍ബര്‍ഗ് റിപ്പോര്‍ട്ട് ഉന്നയിച്ചത്.
അന്വേഷണം നടത്താന്‍ ആറുമാസം കൂടി വേണമെന്ന സെബിയുടെ ആവശ്യം തള്ളിയ കോടതി അന്വേഷണം മൂന്ന് മാസം കൊണ്ട് പൂര്‍ത്തികരിക്കാന്‍ ആവശ്യപ്പെട്ടു. അദാനിയുടെ വളരെ സങ്കീര്‍ണ്ണമായ ഇടപാടുകള്‍ വിശദമായി അന്വേഷിക്കാന്‍ കൂടുതല്‍ സമയം വേണമെന്നാണ് സെബിക്ക് വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്തയുടെ ആവശ്യം. എന്നാല്‍ അതിനു കഴിയില്ല എന്നാ നിലപാടാണ് സുപ്രീം കോടതി സ്വീകരിച്ചത്.
ചീഫ് ജസ്റ്റിസ് അധ്യക്ഷനായ ബെഞ്ചാണ് ഹര്‍ജി പരിഗണിച്ചത്. ജസ്റ്റിസുമാരായ പി എസ് നരസിംഹ, ജെ ബി പാര്‍ഡിവാല എന്നിവര്‍ കൂടി ഉള്‍പ്പെട്ട ബെഞ്ച്‌ ഈ മാസം 15 ന് വീണ്ടും കേസ് പരിഗണിക്കും. രണ്ടു മാസത്തിനകം ക്രമക്കേട് സംബന്ധിച്ച് അന്വേഷണം നടത്തി റിപ്പോര്‍ട്ട് നല്‍കാന്‍ മാര്‍ച്ച് 2 നാണ് സെബിക്ക് സുപ്രീം കോടതി നിര്‍ദ്ദേശം നല്‍കിയത്.
