ഡല്‍ഹി: വ്യവസായി എം എ യൂസഫലി, ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ മകന്‍ വിവേക് ഡോവല്‍ എന്നിവര്‍ക്കെതിരെ വ്യാജ ആരോപണം ഉന്നയിച്ച കേസില്‍ ഓണ്‍ലൈന്‍ മാധ്യമമായ മറുനാടന്‍ മലയാളിയുടെ എഡിറ്റര്‍ ഷാജന്‍ സ്‌കറിയക്ക് ലക്‌നൗ കോടതിയുടെ സമന്‍സ്. ലക്‌നൗ ചീഫ് ജുഡീഷ്യല്‍ മജിസ്‌ട്രേറ്റ് ആണ് സമന്‍സ് അയച്ചത്. മറുനാടന്‍ മലയാളിയുടെ സിഇഒ ആന്‍ മേരി ജോര്‍ജ്ജ്, ഗ്രൂപ്പ് എഡിറ്റര്‍ റിജു എന്നിവര്‍ക്കും സമന്‍സുണ്ട്. മൂന്നുപേരും ജൂണ്‍ ഒന്നിന് ലക്‌നൗ കോടതിയില്‍ ഹാജരാകണമെന്നാണ് നിര്‍ദേശം. ലക്‌നൗവിലെ ലുലു മാള്‍ ഡയറക്ടര്‍ രഞ്ജിത്ത് ഫയല്‍ ചെയ്ത അപകീര്‍ത്തിക്കേസിലാണ് സമന്‍സ്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മറുനാടന്‍ മലയാളി യൂട്യൂബ് ചാനലില്‍ സംപ്രേക്ഷണം ചെയ്ത രണ്ട് വീഡിയോകളാണ് കേസിനാധാരം. നോട്ട് അസാധുവാക്കിയതിനുശേഷം വിവേക് ഡോവലിന്റെ കമ്പനിയായ ജിഎന്‍വൈ ഏഷ്യാ ഹെഡ്ജ് ഫണ്ട് അക്കൗണ്ടിലേക്ക് 8300 രൂപ കളളപ്പണ ഇടപാടിലൂടെ എത്തിയെന്നും യൂസഫലിയുമായി ബന്ധമുളള ലുലു ഗ്രൂപ്പിന്റെ ഇന്റര്‍നാഷണല്‍ ഡയറക്ടര്‍ മുഹമ്മദ് അല്‍ത്താഫിന് ഈ ഇടപാടുമായി ബന്ധമുണ്ടെന്നുമാണ് ഷാജന്‍ സ്‌കറിയ ആരോപിച്ചത്. രണ്ട് വീഡിയോകളിലും യൂസഫലിക്കും വിവേക് ഡോവലിനുമെതിരെ വ്യാജ ആരോപണങ്ങളുന്നയിച്ചു എന്നാണ് അപകീര്‍ത്തിക്കേസില്‍ പറയുന്നത്. ഷാജന്‍ സ്‌കറിയയുടെ വ്യാജ ആരോപണങ്ങള്‍ പ്രഥമദൃഷ്ട്യാ അപകീര്‍ത്തികരമാണ് എന്ന് ചൂണ്ടിക്കാട്ടിയാണ് പ്രതികള്‍ക്ക് നേരിട്ടുഹാജരാകാന്‍ കോടതി സമന്‍സ് അയച്ചത്.
