ചെന്നൈ: ഭര്‍ത്താവ് വിദ്യാസാഗറിന്റെ വിയോഗത്തിനുപിന്നാലെ നടി മീനയ്‌ക്കെതിരെ പ്രചരിച്ച വ്യാജ വാര്‍ത്തകളില്‍ പ്രതികരണവുമായി മകളും ബാലതാരവുമായ നൈനിക. നടി എന്നതിലുപരി അവര്‍ ഒരു മനുഷ്യസ്ത്രീയാണെന്നും അമ്മയെക്കുറിച്ച് ഇത്തരം വാര്‍ത്തകള്‍ പ്രചരിപ്പിക്കുന്നത് അവസാനിപ്പിക്കണമെന്നുമാണ് നൈനിക പറയുന്നത്. സിനിമാ രംഗത്ത് നാല്‍പ്പതുവര്‍ഷം പൂര്‍ത്തിയാക്കിയ വേളയില്‍ മീന സിനിമയിലെ തന്റെ സഹപ്രവര്‍ത്തകര്‍ക്കും സുഹൃത്തുക്കള്‍ക്കുമായി ഒരു ഗെറ്റ് ടുഗെതര്‍ പരിപാടി സംഘടിപ്പിച്ചിരുന്നു. ഈ ചടങ്ങില്‍വെച്ചാണ് മകള്‍ വ്യാജവാര്‍ത്തകളില്‍ പ്രതികരിച്ചത്.
'അച്ഛന്‍ പോയതിനുശേഷം അമ്മ വിഷാദത്തിലായിരുന്നു. എന്റെ മുന്നില്‍വച്ചുതന്നെ അമ്മ ഒരുപാട് കരഞ്ഞിട്ടുണ്ട്. അതിനിടെയാണ് പ്രമുഖ വാര്‍ത്താ ചാനലുകളുള്‍പ്പെടെ അമ്മക്കെതിരെ വ്യാജ വാര്‍ത്തകള്‍ പ്രചരിപ്പിച്ചത്. അമ്മ വീണ്ടും ഗര്‍ഭിണിയാണ് എന്നതാണ് അതില്‍ എനിക്ക് മറക്കാനാവാത്ത ഒരു വാര്‍ത്ത. എനിക്കത് ആദ്യം തമാശയായാണ് തോന്നിയത്. പക്ഷെ വ്യാജ വാര്‍ത്തകളുടെ എണ്ണം കൂടിയപ്പോള്‍ എനിക്കത് അംഗീകരിക്കാനാവാതെയായി. എനിക്കുവേണ്ടിയെങ്കിലും ഇതൊക്കെ അവസാനിപ്പിക്കൂ. അമ്മ ഒരു നടിയായിരിക്കാം. പക്ഷെ അവര്‍ ഒരു മനുഷ്യസ്ത്രീയുമാണ്. അവര്‍ക്കും വികാരങ്ങളുണ്ട്. ആരെങ്കിലും നിങ്ങളോട് ഇങ്ങനെ ചെയ്താല്‍ നിങ്ങള്‍ക്ക് വിഷമമാകില്ലേ. അതുപോലെയാണ് ഞങ്ങള്‍ക്കും. അതുകൊണ്ട് ഇങ്ങനെ ചെയ്യുന്നത് അവസാനിപ്പിക്കൂ'- നൈനിക പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കഴിഞ്ഞ വര്‍ഷം ജൂണ്‍ 28-നാണ് മീനയുടെ ഭര്‍ത്താവ് അന്തരിച്ചത്. ശ്വാസകോശ സംബന്ധമായ അസുഖത്തെത്തുടര്‍ന്നായിരുന്നു അന്ത്യം. അതിനുപിന്നാലെയാണ് മീനക്കെതിരെ വ്യാപക വ്യാജ പ്രചാരണങ്ങള്‍ നടന്നത്. മീനയും നടന്‍ ധനുഷും വിവാഹിതരാകുന്നുവെന്നും മീന ഗര്‍ഭിണിയാണെന്നുമുള്‍പ്പെടെയാണ് പ്രചരിച്ചത്. ഇതിനെതിരെ മീനയും നേരത്തെ രംഗത്തെത്തിയിരുന്നു. ഭര്‍ത്താവ് തങ്ങളെ വിട്ടുപോയെന്ന് ഇനിയും വിശ്വസിക്കാനായിട്ടില്ലെന്നും അതിനിടെ ഇത്തരം കിംവദന്തികള്‍ പ്രചരിക്കുന്നത് എങ്ങനെയാണെന്ന് മനസിലാവുന്നില്ലെന്നുമാണ് മീന പറഞ്ഞത്.
