തിരുവനന്തപുരം: കെ ആര് നാരായണന് ഫിലിം ഇന്സ്റ്റിറ്റ്യൂട്ടിലെ ജാതിവിവേചനത്തിനെതിരായ സമരത്തെ അധിക്ഷേപിച്ച അടൂര് ഗോപാലകൃഷ്ണനെ പുറത്താക്കാന് സര്ക്കാര് നടപടിയെടുക്കണമെന്ന് സംവിധായകന് ജിയോ ബേബി. വിദ്യാര്ത്ഥികള് ഉന്നയിക്കുന്ന ആരോപണങ്ങളുടെ സത്യസന്ധതയാണ് അടൂര് ഗോപാലകൃഷ്ണന്റെ പരാമര്ശങ്ങള് തെളിയിക്കുന്നതെന്നും ഇത്തരം ചിന്താഗതികള് വച്ചുപുലര്ത്തുന്ന അടൂരിനെ ഫിലിം ഇന്സ്റ്റിറ്റ്യൂട്ടിന്റെ തലപ്പത്തുനിന്നും എത്രയുംവേഗം നീക്കാനുളള ആര്ജ്ജവം സര്ക്കാര് കാണിക്കണമെന്നും ജിയോ ബേബി പറഞ്ഞു.
'കെ ആര് നാരായണന് ഇന്സ്റ്റിറ്റ്യൂട്ടിലെ സമരം സത്യസന്ധമാണെന്ന് അടൂരിന്റെ വാക്കുകളിലൂടെ തെളിഞ്ഞിരിക്കുകയാണ്. ഐഎഫ്എഫ്കെ വേദിയില് പ്രതിഷേധിച്ചവരെ വൈകാരിക ജീവികളായാണ് അടൂര് കാണുന്നത്. സ്ത്രീകള് ഉടുത്തൊരുങ്ങുന്നതിലും ഡബ്ലു സിസിയിലുമെല്ലാം അദ്ദേഹം കുഴപ്പം കാണുന്നുണ്ട്. ഉടുത്തൊരുങ്ങുന്നതും ഫെമിനിസം സംസാരിക്കുന്നതും തെറ്റാണെന്ന ചിന്താഗതിയുളള ഒരാള് എങ്ങനെയാവും വിദ്യാര്ത്ഥികളുടെ സമരത്തോട് പ്രതികരിച്ചിരിക്കുക എന്നത് ഇവിടെ തെളിയിക്കപ്പെടുകയാണ്. ഇത്തരം ചിന്താഗതിയുളള ആളെ എത്രയുംവേഗം ചെയര്മാന് പദവിയില്നിന്ന് മാറ്റാന് സര്ക്കാരിന്റെ ഭാഗത്തുനിന്നും ഇടപെടലുണ്ടാവണം'- ജിയോ ബേബി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നാലഞ്ച് പെണ്ണുങ്ങളുണ്ട് ഇവിടെ. അവര് ഉടുത്തൊരുങ്ങിവന്നാണ് പരാതി പറയുന്നത്. കണ്ടാല് ഡബ്ല്യുസിസിക്കാരെ പോലെയാണ്. സിനിമാതാരങ്ങളുടെ സ്റ്റൈലിലാണ് പരാതി പറയുന്നത്- എന്നാണ് അടൂര് ഗോപാലകൃഷ്ണന് പറഞ്ഞത്. പഠിക്കാന് വരുന്ന കുട്ടികള് പഠിച്ചിട്ട് പോകണം. അല്ലാതെ സമരത്തിനിറങ്ങുകയല്ല വേണ്ടത്. പഠിക്കാന് ആഗ്രഹമില്ലാത്തവര് പിരിഞ്ഞുപോകണം. ഇന്സ്റ്റിറ്റ്യൂട്ടില് ജാതിവിവേചനം നടന്നിട്ടില്ല. സംവരണം അട്ടിമറിക്കപ്പെട്ടിട്ടില്ല- എന്നും അടൂര് പറഞ്ഞിരുന്നു.