തിരുവനന്തപുരം: ഹാപ്പിനെസ് ഇന്റര്നാഷണല് ഫിലിം ഫെസ്റ്റിവലില്നിന്ന് ഫ്രീഡം ഫൈറ്റ് എന്ന സിനിമ പിന്വലിക്കുന്നതായി സംവിധായകന് ജിയോ ബേബി. കെ ആര് നാരായണന് ഇന്സ്റ്റിറ്റ്യൂട്ടില് ഏകാധിപത്യ ഭരണം നടത്തി കുട്ടികളുടെ ഭാവി നശിപ്പിക്കുന്ന അടൂര് ഗോപാലകൃഷ്ണന് മേളയുടെ ഉദ്ഘാടകനാവുന്നതില് പ്രതിഷേധിച്ചാണ് സിനിമ പിന്വലിക്കുന്നതെന്ന് ജിയോ ബേബി പറഞ്ഞു. അടൂര് ഗോപാലകൃഷ്ണനെതിരെയും ശങ്കര്മോഹനെതിരെയും നിയമനടപടികള് സ്വീകരിക്കണമെന്നും ജിയോ ബേബി ഫേസ്ബുക്കില് പങ്കുവെച്ച കുറിപ്പില് ആവശ്യപ്പെട്ടു.
'ഫ്രീഡം ഫൈറ്റ് എന്ന ഞങ്ങളുടെ സിനിമ ഹാപ്പിനെസ് ഇന്റര്നാഷണല് ഫിലിം ഫെസ്റ്റിവലില് തെരഞ്ഞെടുക്കപ്പെട്ടിട്ടുളളതാണ്. സിനിമ ഞങ്ങള് ഫിലിം ഫെസ്റ്റിവലില്നിന്നും പിന്വലിക്കുകയാണ്. ഇത്രയധികം ആരോപണങ്ങള് നേരിടുന്ന, കെ ആര് നാരായണന് ഫിലിം ഇന്സ്റ്റിറ്റ്യൂട്ടില് ഏകാധിപത്യ ഭരണം നടത്തി കുട്ടികളുടെ ഭാവി നശിപ്പിക്കുന്ന അടൂര് ഗോപാലകൃഷ്ണന് മേളയുടെ ഉദ്ഘാടകന് ആവുന്നതില് പ്രതിഷേധിച്ചാണ് സിനിമ പിന്വലിക്കുന്നത്. സര്ക്കാരിന്റെ/ ചലച്ചിത്ര അക്കാദമിയുടെ തീരുമാനത്തെ ശക്തമായി എതിര്ക്കുന്നു. കെ ആര് നാരായണന് ഫിലിം ഇന്സ്റ്റിറ്റ്യൂട്ട് ചെയര്മാന് അടൂര് ഗോപാലകൃഷ്ണന്, ഡയറക്ടര് ശങ്കര് മോഹന് എന്നിവര്ക്കെതിരെ നിയമനടപടികള് സ്വീകരിക്കണം എന്നും ആവശ്യപ്പെടുന്നു'-എന്നാണ് ജിയോ ബേബി ഫേസ്ബുക്കില് കുറിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കോട്ടയത്തുളള കെ ആര് നാരായണന് ഇന്സ്റ്റിറ്റ്യൂട്ടില് ജാതിവിവേചനമുണ്ടെന്ന വിദ്യാര്ത്ഥികളുടെ ആരോപണം അടിസ്ഥാന രഹിതമാണെന്നാണ് അടൂര് ഗോപാലകൃഷ്ണന് പറഞ്ഞത്. ശങ്കര് മോഹന് ജാതിവിവേചനം കാണിക്കുന്നയാളല്ലെന്നും സമരം ചെയ്യുന്നവരുടെ ഉദ്ദേശം ഇന്സ്റ്റിറ്റ്യൂട്ടിനെ നശിപ്പിക്കലാണെന്നും അദ്ദേഹം പറഞ്ഞിരുന്നു.