തിരുവനന്തപുരം: ഇന്ത്യന്‍ നാഷണല്‍ കോണ്‍ഗ്രസിന്‍റെ സമുന്നത നേതാവും മുന്‍ പ്രധാനമന്ത്രി ഇന്ദിരാ ഗാന്ധിയുടെ മകനുമായ അന്തരിച്ച സഞ്ജയ് ഗാന്ധിക്കെതിരെ സഹകരണവകുപ്പ് മന്ത്രി വി.എന്‍ വാസവന്‍ നടത്തിയ വിവാദ പ്രസ്താവന സഭയില്‍ രൂക്ഷമായ വാക്കുതര്‍ക്കങ്ങള്‍ക്കിടയാക്കി. ‘അടിയന്തരാവസ്ഥ പ്രഖ്യാപിച്ച് ഇന്ദിരാഗാന്ധി രാജ്യത്തെ ജനാധിപത്യത്തെ കൊല ചെയ്യുമ്പോള്‍ സഞ്ജയ് ഗാന്ധി റുക്‌സാന സുല്‍ത്താന എന്ന മാദക സുന്ദരിയുടെ മടിയില്‍ തലവച്ചു കിടക്കുകയായിരുന്നു’ എന്നായിരുന്നു മന്ത്രി വാസവന്റെ പ്രസ്താവന.
ഇന്നലെയാണ് മന്ത്രി വിവാദ പ്രസ്താവന നടത്തിയത്. കേരള സഹകരണ സംഘം ഭേദഗതി ബില്ലിന്മേലുള്ള ചര്‍ച്ചക്ക് മറുപടി പറയവേയാണ് മന്ത്രി സഞ്ജയ് ഗാന്ധിക്കെതിരെ മോശം പരാമര്‍ശം നടത്തിയത്. മന്ത്രി വി.എന്‍ വാസവന്റെ പ്രസ്താവനക്കെതിരെ സഭയില്‍ പ്രതിപക്ഷം ശക്തമായ പ്രതിഷേധമാണ് ഉയര്‍ത്തിയത്. സഞ്ജയ് ഗാന്ധിയെ വ്യക്തിപരമായി ആക്ഷേപിക്കുന്ന വാക്കുകള്‍ പിന്‍വലിക്കണമെന്ന് പ്രതിപക്ഷ നേതാവ് വി.ഡി. സതീശന്‍ ആവശ്യപ്പെട്ടു. ഇക്കാര്യം പിന്നീടു പരിശോധിക്കാമെന്ന് ഡപ്യൂട്ടി സ്പീക്കര്‍ മറുപടി നല്‍കി. റഷീദ് കിദ്വായിയുടെ ’24 അക്ബര്‍ റോഡ്’ എന്ന പുസ്തകത്തില്‍ സഞ്ജയ് ഗാന്ധിയും റുക്‌സാന സുല്‍ത്താനയും തമ്മിലുള്ള ബന്ധം സംബന്ധിച്ച് വിവരണമുണ്ട്. ഇതിന്‍റെ അടിസ്ഥാനത്തിലാണ് മന്ത്രി പ്രസ്താവന നടത്തിയത്.
