ചെന്നൈ: നയന്‍താരയെ നായികയാക്കി വിഗ്നേഷ് ശിവന് നിര്‍മ്മിക്കുന്ന നെട്രിക്കണ്‍ ഒടിടി റിലീസിനൊരുങ്ങുന്നു. ഡിസ്‌നി പ്ലസ് ഹോട്ട്‌സ്റ്റാറിലാണ് ചിത്രം റിലീസ് ചെയ്യുന്നത്. 2019 ഡിസംബറില്‍ ചിത്രീകരണം ആരംഭിച്ചിരുന്നെങ്കിലും കൊവിഡിനെത്തുടര്‍ന്ന് ചിത്രീകരണം നിര്‍ത്തിവയ്‌ക്കേണ്ടി വന്നിരുന്നു. ചിത്രം തിയറ്റര്‍ റിലീസ് ഒഴിവാക്കി ഒടിടി വഴി റിലീസ് ചെയ്യുമെന്ന തരത്തില്‍ നേരത്തേ വാര്‍ത്തകള്‍ വന്നിരുന്നു. ഡിസ്‌നി പ്ലസ് ഹോട്ട്‌സ്റ്റാറിന്റെ ഔദ്യോഗിക ട്വിറ്റര്‍ ഹാന്റില്‍ നെട്രിക്കണ്‍ റിലീസിന്റെ വാര്‍ത്ത സ്ഥിരീകരിച്ചുകൊണ്ട് ചിത്രത്തിന്റെ പോസ്റ്റര്‍ പങ്കുവയ്ച്ചിട്ടുണ്ട്.
റിപ്പോര്‍ട്ടുകള്‍ അനുസരിച്ച് 15 കോടി രൂപയ്ക്കാണ് ചിത്രത്തിന്റെ സ്ട്രീമിംഗ് അവകാശങ്ങള്‍ ഡിസ്‌നി പ്ലസ് ഹോട്ട്‌സറ്റാര്‍ സ്വന്തമാക്കിയത്. വിഗ്നേഷിന്റെ പ്രൊഡക്ഷന്‍ ഹൗസായ റൗഡി പിക്‌ച്ചേഴ്‌സും ക്രോസ് പിക്‌ച്ചേഴ്‌സും ചേര്‍ന്നാണ് ചിത്രം നിര്‍മ്മിക്കുന്നത്. മിലിന്ദ് റാവുവാണ് ചിത്രം സംവിധാനം ചെയ്തിരിക്കുന്നത്. നെട്രിക്കണ്ണിന്റെ ഛായാഗ്രഹണം നിര്‍വഹിച്ചിരിക്കുന്നത് ആര്‍ ഡി രാജശേഖറാണ്.
ചിത്രത്തില്‍ അന്ധയായ യുവതിയായാണ് നയന്‍താര വേഷമിടുന്നത്. മലയാളി താരം അജ്മലാണ് ചിത്രത്തില്‍ വില്ലന്‍ കഥാപാത്രത്തെ അവതരിപ്പിക്കുന്നത്. 1981-ല്‍ രജനീകാന്ത് നായകനായി പുറത്തിറങ്ങിയ ചിത്രത്തിന്റെ അതേപേരാണ് നയന്‍ താരയുടെ ചിത്രത്തിനും. നെട്രിക്കണ്‍ എന്ന പേര് ഉപയോഗിക്കാന്‍ ചിത്രത്തിന്റെ നിര്‍മാതാക്കള്‍ വിഗ്നേഷ് ശിവന് അനുമതി നല്‍കിയിരുന്നു.
