ബംഗളുരു: ഭീമ കൊറേഗാവ് കേസില് അറസ്റ്റിലായ ആക്ടിവിസ്റ്റ് ഗൗതം നവ്ലഖയുടെ ജാമ്യാപേക്ഷ സുപ്രീംകോടതി ബുധനാഴ്ച്ച പരിഗണിക്കും. ജാമ്യാപേക്ഷ തളളിക്കൊണ്ട് ഫെബ്രുവരി എട്ടിന് ബോംബൈ ഹൈക്കോടതി നല്കിയ ഉത്തരവിനെതിരെ ഫെബ്രുവരി 19-നാണ് ഗൗതം സുപ്രീംകോടതിയെ സമീപിച്ചത്. ജസ്റ്റിസുമാരായ യുയു ലളിത്, ഇന്ദിരാ ബാനര്ജി, കെഎം ജോസഫ് എന്നിവരുള്പ്പെടുന്ന മൂന്നംഗ ബെഞ്ച് മാര്ച്ച് മൂന്നിനാണ് കേസില് വാദം കേള്ക്കുക.
കഴിഞ്ഞ ദിവസം, ഭീമ കൊറേഗാവ് കേസില് മനുഷ്യാവകാശപ്രവര്ത്തകനും കവിയുമായ വരവര റാവുവിന് ബോംബൈ ഹൈക്കോടതി ഇടക്കാല ജാമ്യം അനുവദിച്ചിരുന്നു. ആരോഗ്യപ്രശ്നങ്ങള് ചൂണ്ടിക്കാട്ടിയുളള ജാമ്യാപേക്ഷയില് ആറു മാസത്തേക്കാണ് ജാമ്യം അനുവദിച്ചത്.
2017 ഡിസംബര് 31-നാണ് കേസിനാസ്പദമായ സംഭവം. പൂനെയില് നടന്ന എല്ലാള് പരിഷത്ത് കോണ്ക്ലേവില് പ്രകോപനപരമായ പ്രസ്താവനകള് നടത്തിയെന്നാരോപിച്ചാണ് ഗൗതം നവ്ലഖയുള്പ്പെടെയുളള ആക്ടിവിസ്റ്റുകളെ അറസ്റ്റ് ചെയ്തത്. പ്രസ്താവനകള് ഭീമ കൊറേഗാവ് പ്രദേശത്ത് കലാപമുണ്ടാവാന് കാരണമായെന്നും ആക്ടിവിസ്റ്റുകള്ക്ക്് മാവോയിസ്റ്റ് പിന്തുണയുണ്ടെന്നുമാണ് പൊലീസിന്റെ വാദം. നാഷണല് ഇന്വെസ്റ്റിഗേഷന് ഏജന്സി കേസ് അന്വേഷിച്ചുവരികയാണ്.