തിരുവനന്തപുരം: വിദേശത്തു നിന്ന് മടങ്ങി വരുന്നവര്‍ ഉടന്‍ ആരോഗ്യവകുപ്പില്‍ റിപ്പോര്‍ട്ട് ചെയ്യണമെന്ന കര്‍ശന നിര്‍ദ്ദേശമാണ് സംസ്ഥാന സര്‍ക്കാര്‍ നല്‍കിയിരിക്കുന്നത്. ഇതില്‍ വീഴ്ച്ചവരുത്തുന്നത് സംസ്ഥാനത്ത് രോഗം പടര്‍ന്നുപിടിക്കുന്നതിനും സകല നിയന്ത്രണങ്ങളും വിട്ടുപോകുന്നതിനും ഇടയാക്കും. കേരളത്തിലെ ഏത് വിമാനത്താവളത്തിലാണോ വന്നിറങ്ങുന്നത് അവിടെ പരിശോധനക്ക് വിധേയമാകാന്‍ തയാറാവണം.
പരിശോധകളോടും, നിരീക്ഷണ സംവിധാനങ്ങളോടും സഹകരിക്കാതിരിക്കുന്നത് കുറ്റമായി കണക്കാക്കും. കോവിഡ്- 19 വൈറസ് ബാധയുള്ള രാജ്യങ്ങളില്‍ നിന്ന് എത്തുന്നവരില്‍ റിപ്പോര്‍ട്ട് ചെയ്യാന്‍ വിമുഖത കാണിക്കുന്നവര്‍ക്കെതിരെ കര്‍ശന നടപടികളിലേക്ക് കടക്കാനാണ് സംസ്ഥാന സര്‍ക്കാരിന്‍റെ തീരുമാനം. ഇത്തരക്കാരെ പ്രോസിക്യുഷന്‍ നടപടികള്‍ക്ക് വിധേയമാക്കുമെന്നും ആരോഗ്യ വകുപ്പ് വൃത്തങ്ങള്‍ അറിയിച്ചു.
